កាលពីថ្ងៃទី ២១ ខែវិច្ឆិកា ឆ្នាំ ២០២៥ កន្លងទៅនេះ ពិធីបុណ្យសពរបស់តារាប្រុស លោក អ៊ុន សិទ្ធា បានរៀបចំទៅតាមប្រពៃណី ដោយបន្សល់ទុកនូវភាពអាលោះអាល័យ ក្តីសោកសង្រេង និង ការចងចាំជាច្រើន។ ក្នុងនោះពិធីបូជាសពរបស់លោក អ៊ុន សិទ្ធា ក៏មានការចូលរួមជូនដំណើរជាលើកចុងក្រោយពីសំណាក់អ្នកគាំទ្រ ក្រុមគ្រួសារ និង មិត្តភក្តិ ទាំងក្នុង-ក្រៅសិល្បៈជាច្រើនផងដែរ។
ក្រោយពិធីបូជាសពបានបញ្ចប់រួចរាល់នៅថ្ងៃទី ២១ ខែវិច្ឆិកា ឆ្នាំ ២០២៥ កន្លងទៅនេះ ក្មួយរបស់លោក អ៊ុន សិទ្ធា បានធ្វើការបង្ហោះសារមួយនៅលើផេកហ្វេសប៊ុករបស់លោក អ៊ុន សិទ្ធា ផ្ទាល់ ដោយបានសំណូមពរមហាជនកុំបន្តវែកញែកពីលោកពូរបស់ខ្លួនទៀត។
សារនោះដែរ ក្មួយលោក អ៊ុន សិទ្ធា បានរៀបរាប់ថា ៖ «ពូខ្ញុំ គាត់ទៅបានសុខហេីយ អ៊ីចឹងក្នុងនាមខ្ញុំជាក្មួយ សំពះសុំបងប្អូនឈប់បន្តការបង្ហោះវែកញែករឿងរ៉ាវគាត់អីទៀត! កុំឱ្យវិញ្ញាណក្ខន្ធគាត់នៅមិនដាច់អាល័យ»។
គួរឱ្យដឹងថា ការងបង្ហោះសារសំណូមពរពីក្មួយរបស់លោក អ៊ុន សិទ្ធា អាចបន្ទាប់មកពីមានការវែកញែកពាក់ព័ន្ធនឹងរឿងដែលលោកឈឺមិនហ៊ានប្រកាស ក៏ព្រោះតែខ្លាចពាក្យថា «អ្នកសិល្បៈ ឈឺរកជំនួញ» នោះ៕
