ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេសអ្នកគាំទ្រតារាចម្រៀងរ៉េប Goofy មានការភ្ញាក់ផ្អើលយ៉ាងខ្លាំង ខណៈមានគណនីមួយបានបង្ហោះសារថាតារាចម្រៀងរ៉េបរូបនេះបានជំពាក់លុយមិនសង។
គណនីហ្វេសប៊ុកដែលបានបង្ហោះនោះមានឈ្មោះ Lyna Lyna ហើយតាមរយៈសារដំបូងដែលបានបង្ហោះឡើងពីម្ចាស់គណនីនេះបានរៀបរាប់ថា ៖ «អាតារារ៉េប លំដាប់រងទី ២ ហែងល្ងាចនេះមិនបង់លុយអញទេ ខ្ញុំនឹងដាក់ឱ្យហែងផ្អេីអស់ភពទាំង ៣ សុទ្ធតែប្រឡងនៅផលិតកម្ម Baramey អាប្រហោងក្នុង»។ បន្ថែមពីនោះ គណនីខាងលើក៏បានបង្ហោះសារមួយទៀត ដោយបានហៅចំឈ្មោះថា ៖ «ហ្វី ក្បាលខូច តបឆាតបង ផងពៅមាស អូនតារាផង ពៅលុយ ៥០០$ ចរិត ឱ្យថ្លៃថ្នូរតិចទៅពៅ»។
ក្រោយពីផ្ទុះការចែករំលែកសារខាងលើហើយនោះ ម្ចាស់សាមីខ្លួនគឺលោក Goofy ក៏បានចេញមកបង្ហោះសារសុំពេលម្ចាស់បំណុល រកលុយដើម្បីសងថា ៖ «ខ្ញុំសុំទោសម្ចាស់បំណុលទាំងអស់ផង កំហុសទាំងអស់ដាក់ឱ្យតែខ្ញុំម្នាក់បានហើយ ខ្ញុំ ប្រពន្ធកូនខ្ញុំ ពួកគាត់អត់ដឹងរឿងនឹងទេ ហើយខ្ញុំសុំលើកម្រាមដៃដប់ សុំទោសម្ចាស់បំណុលទាំងអស់ផង សុំពេលបងៗទាំងអស់ទុខពេលឱ្យខ្ញុំចុះ ខ្ញុំសុំពេលរកលុយដោះស្រាយឱ្យបងៗគ្រប់ចំនួនដែលខ្ញុំបានខ្ញុំខ្ចី»។
លើសពីនោះ លោក Goofy ក៏បានបន្ថែមក្នុងខមមិនថា ៖ «ខ្ញុំសំស្បថថា ខ្ញុំមិនរត់ចោលម្ចាស់បំណុលណាម្នាក់ឡើយ ខ្ញុំនឹងរកលុយសងបងៗគ្រប់»៕
