នៅថ្ងៃទី ០៨ ខែកក្កដា ឆ្នាំ ២០២៥ តាមរយៈគណនីវេជ្ជបណ្ឌិត ហ៊ាង រតនា បានបង្ហោះសារឱ្យដឹងថា ពេលនេះគ្លីនិកមេត្តាសំណង់ ១២ ត្រូវបានបិទហើយ។ លោកបានបន្តថា ៖ «ខ្ញុំមានមនោសញ្ជេតនា និង អនុស្សាវរីយ៍ ជាមួយទីនេះ និង ជាមួយអ្នកជំងឺនៅទីនេះច្រើនណាស់ ពេលនេះបេះដូងរបស់ខ្ញុំដូចត្រូវបានកាំបិតមួយចាក់យ៉ាងជ្រៅ ណាមួយគឺទិដ្ឋភាពដែលម្តាយឱបសាកសពកូនយំនៅដិតដាមចំពោះមុខខ្ញុំ នេះគឺជាលើកទីមួយហើយក្នុងឆាកជីវិតខ្ញុំ ដែលខ្ញុំព្យាយាមជួយសង្រ្គោះអ្នកជំងឺដោយខ្លួនឯងផ្ទាល់ហើយ ហើយបញ្ជូនជំងឺបន្តដើម្បីជួយសង្រ្គោះ តែនៅតែមិនអាចជួយសង្រ្គោះអ្នកជំងឺបាន»។
ក្រោយជួបរឿងបែបនេះ វេជ្ជបណ្ឌិតរូបនេះ បានបញ្ជាក់ពីអារម្មណ៍របស់លោកឱ្យដឹងថា ៖ «វាបានប៉ះទង្គិចផ្លូវចិត្តខ្ញុំខ្លាំងណាស់ នៅហេតុការណ៍ទាំងនេះ និង ជាពិសេសនៅពេលឮពាក្យថា «ព្យាបាលដើម្បីលុយ»។ ខ្ញុំដឹងច្បាស់អំពីខ្លួនឯង ថាទឹកចិត្តខ្ញុំបែបណា ថាចង់ធ្វើអ្វីដើម្បីអ្វី ទស្សនៈវិស័យរបស់ខ្លួនឯងបែបណា ខ្ញុំលះបង់អ្វីខ្លះ។ ពេលនេះខ្ញុំសួរខ្លួនឯងថាតើ ខ្ញុំគួរបន្តទៀតទេ??? នោះសូមបងប្អូនវាយតម្លៃចុះ ថាខ្ញុំជាមនុស្សបែបណា ជាគ្រូពេទ្យបែបណា?»។
លោកបានបន្តទៀតថា «បងប្អូនអាចខំមិនបានទាំងអស់ មិនថាបងប្អូនជាគ្រូពេទ្យ អ្នកស្អប់ខ្ញុំ អ្នកស្រលាញ់ខ្ញុំ ជាអ្នកជំងឺខ្ញុំ ឬក៏មិនមែន បើខ្ញុំមើលឃើញថា មានខំមិនចាប់ពី 5% ទៅ ថាខ្ញុំជាគ្រូពេទ្យមិនល្អ នោះខ្ញុំនឹងបញ្ចប់អាជីពជាគ្រូពេទ្យរបស់ខ្លួន បោះបង់សញ្ញាបត្រ និង គណៈគ្រូពេទ្យរបស់ខ្ញុំចោល និង ឈប់ធ្វើជាគ្រូពេទ្យពេញមួយជីវិតរហូតដល់ថ្ងៃខ្ញុំស្លាប់» លើសពីនេះ លោកក៏បានបញ្ជាក់បន្ថែមថា សារនេះមិនមែនជាការឆ្លើយតប ឬបកស្រាយអ្វីមួយនោះទេ គឺលោកគ្រាន់តែចង់រំដោះផ្លូវចិត្តរបស់លោកប៉ុណ្ណោះ៕
