ថ្មីៗនេះ មានក្រុមហ៊ុនមួយនៅក្នុងប្រទេសជប៉ុន បានបើកទទួលការបរិច្ចាគលាមកជាផ្លូវការ ដោយក្នុងបំណងចម្រាញ់យកបាក់តេរីល្អៗ ទៅផលិតជាថ្នាំការពារជំងឺរលាកក្រពះពោះវៀន រួមនឹងជំងឺផ្សេងទៀត ហើយនឹងដាក់ឱ្យប្រើប្រាស់នៅលើទីផ្សារ។
តាមព័ត៌មានបានឱ្យដឹងថា ក្រុមហ៊ុនខាងលើនេះមានឈ្មោះថា MetaGen Therapeutics បានបង្កើតបន្ទប់បរិច្ចាគលាមកដែលឈ្មោះថា Tsuruoka Poop ហើយបានបើកឱ្យប្រជាជននៅក្រុង Tsuruoka បានទៅបរិច្ចាគមុនគេ ព្រោះអ្នកនៅទីនេះបានបរិភោគអាហារសមុទ្រ និង បន្លែផ្លែឈើតាំងពីយូរណាស់មកហើយ ដូច្នេះលាមកពួកគេអាចមានគុណភាពល្អ។ ក្នុងនោះ អ្នកដែលបរិច្ចាគបាន គឺមានអាយុពី ១៨ ឆ្នាំ ដល់ ៦៥ ឆ្នាំ ហើយត្រូវឆ្លងកាត់ការពិនិត្យសុខភាពជាប្រចាំ ព្រមទាំងការធ្វើតេស្តឈាម និងការធ្វើតេស្តបាក់តេរីពោះវៀនផងដែរ។ លើសពីនេះទៀត មុនពេលបរិច្ចាគ ៣ ថ្ងៃ ត្រូវតមស្រា ជាមួយនឹងអាហារឆៅទៀតផង ប៉ុន្តែពួកគេនឹងទទួលបានប្រាក់លើកទឹកចិត្តពី ៣០០០ ទៅ ៥០០០ យេន ក្នុងការបរិច្ចាគមួយដង។
យ៉ាងណាមិញ ខាងក្រុមហ៊ុនបានឱ្យដឹងថា ក្រោយពីស្រាវជ្រាវរួច គេនឹងយកថ្នាំទៅសាកល្បងលើមនុស្ស ទាំងក្នុងប្រទេសជប៉ុន និង សហរដ្ឋអាមេរិកនៅក្នុងឆ្នាំ ២០២៦ ហើយគេនឹងមានគម្រោងដាក់ឱ្យប្រើប្រាស់ជាផ្លូវការនៅក្នុងទីផ្សារនាឆ្នាំ ២០៣២ ខាងមុខនេះ៕
ប្រភព៖ Khaosod
