ថ្មីៗនេះ មានក្រុមហ៊ុនរោងចក្រមួយនៅប្រទេសចិន បានធ្វើឱ្យមហាជនមានការហួសចិត្ត ដោយបានចេញច្បាប់ចម្លែក គឺតម្រូវឱ្យបុគ្គលិកដែលនៅលីវរៀបការឱ្យបានក្នុងរយៈពេលត្រឹម ៩ ខែ បើមិនដូច្នោះ នឹងត្រូវដេញចេញ។
តាមព័ត៌មានបានឱ្យដឹងថា ក្រុមហ៊ុនមួយនេះបានប្រកាសកាលពីខែមករា ឆ្នាំ ២០២៥ កន្លងទៅថា ក្រុមហ៊ុននឹងចូលរួមលើកកម្ពស់វប្បធម៌នៃការឧស្សាហ៍ព្យាយាម និង ការដឹងគុណចំពោះឪពុកម្តាយ ហើយការបង្កើតគ្រួសារគឺជាចំណែកមួយនៃការជួយលើកវប្បធម៌នេះ ដូច្នេះហើយបុគ្គលិកនៅលីវត្រូវតែរៀបការ និង បង្កើតគ្រួសារដើម្បីបានកូនចៅដែលជាកម្លាំងសំខាន់សម្រាប់ប្រទេស។
ក្នុងនោះ ក្រុមហ៊ុនបានកំណត់ត្រឹមថ្ងៃទី ៣០ ខែកញ្ញា ឆ្នាំ ២០២៥ សម្រាប់ឱ្យបុគ្គលិករៀបការ ហើយបើសិនជាបុគ្គលិកធ្វើមិនបាននោះ ខាងក្រុមហ៊ុននឹងលុបកិច្ចសន្យាការងារចោល។ ខាងក្រុមហ៊ុនបានសង្កត់ធ្ងន់ទៀតថា ការមិនរៀបការសាងគ្រួសារ ឬ ការមិនមានដៃគូ គឺចាត់ទុកថាជាអាកប្បកិរិយាមិនស្មោះត្រង់ មិនដឹងគុណ និង ខ្វះក្តីមេត្តាទៀតផង៕
ប្រភព៖ Sanook
