ក្រោយពីមានបែកធ្លាយសារសំឡេងរវាង Paethongtarn Shinawat នាយករដ្ឋមន្រ្តីរបស់ថៃ និង សម្តេច ហ៊ុន សែន មក ប្រជាជនថៃកាន់តែខឹងសម្បាលើសដើម ហើយពួកគេទាមទារឱ្យលោកស្រីលាលែងពីតំណែង បើទោះជាលោកស្រីចេញមុខសុំទោសរួចហើយក៏ដោយ។
ជាក់ស្តែងនៅថ្ងៃទី ១៩ ខែមិថុនា ឆ្នាំ ២០២៥ នេះ ក្រុមបាតុករថៃ ដែលហៅថាក្រុមគណៈកម្មាធិការប្រជាជនដើម្បីការផ្លាស់ប្តូរប្រទេសថៃ បាននាំគ្នាចេញមកធ្វើបាតុកម្មជាថ្មី ដោយការខឹងមិនសុខចិត្ត ក្រោយពីបានឮការបែកធ្លាយកិច្ចសន្ទនារបស់នាយករដ្ឋមន្រ្តីខ្លួនជាមួយនឹងសម្តេច ហ៊ុន សែន នាពេលកន្លងមក។ ក្រុមបាតុករ បានលើកឡើងថា នាយករដ្ឋមន្រ្តីគ្មានការតាំងចិត្តក្នុងការការពារប្រទេសឡើយ ដូច្នេះហើយសុំឱ្យបក្សទាំងអស់នៅក្នុងរដ្ឋាភិបាលដកខ្លួនចេញ ហើយនាយករដ្ឋមន្រ្តីត្រូវទទួលខុសត្រូវដោយលាលែងចេញពីតំណែងយ៉ាងប្រញាប់។
លើសពីនេះទៅទៀត នៅថ្ងៃទី ២១ ខែមិថុនា ឆ្នាំ ២០២៥ ខាងមុខ ក្រុមគណៈកម្មាធិការប្រជាជនដើម្បីការផ្លាស់ប្តូរប្រទេសថៃ នឹងមានបើកការដឹកនាំបាតុកម្មទ្រង់ទ្រាយធំរហូតដល់ថ្ងៃទី ២៤ ខែមិថុនា ឆ្នាំ ២០២៥ ដោយនឹងលោមព័ទ្ធវិមានរដ្ឋាភិបាលទាំងច្រកចេញ និង ច្រកចូល ដើម្បីដាក់សម្ពាធឱ្យនាយករដ្ឋមន្រ្តីលាលែងចេញពីតំណែងឱ្យបាន៕
ប្រភព៖ Khaosod
