ក្រោយម៉ោងចេញពីធ្វើការ មិត្តរួមការងាររមែងតែបបួលគ្នាទៅរំដោះស្រ្តេស ឬរំសាយភាពតានតឹងនៅកន្លែងផ្សេងៗ ដូចជា បារ ឡោញ ឬ ភោជនីយដ្ឋាន ដែលជាកន្លែងជួបជុំជល់កែវដ៏ពេញនិយម។ ទោះម៉ោងក្រៅការងារ ប៉ុន្តែវាមិនមែនជាពេលជជែកវែកញែករឿងគ្រប់យ៉ាងតាមតែចិត្តនោះទេ ជួនកាលម្នាក់ក្នុងចំណោមនោះ អាចនឹងធ្វើឱ្យអ្នកហានិភ័យផងដែរ។ បើចង់សុខ ចង់ធ្វើការដោយសន្តិភាព ពេលជួបជុំផឹកស៊ីជាមួយមិត្តរួមការងារក្រៅម៉ោង គួរកុំនិយាយរឿង ៥ យ៉ាងនេះ។
១. កន្លែងធ្វើការមិនកើត មិនស្តង់ដា
គួរកុំនិយាយអ្នកមិនពេញចិត្តបរិយាកាសកន្លែងធ្វើការ ឬកន្លែងធ្វើការមិនល្អបែបនេះ មិនល្អបែបនោះ កន្លែងគ្មានស្តង់ដា ឬប្រៀបធៀបកន្លែងធ្វើការរបស់ខ្លួនអន់ជាងកន្លែងគេ…ជាដើម។ ការនិយាយបែបនេះ វានឹងធ្វើឱ្យមិត្តរួមការងារមានអារម្មណ៍ថាអ្នកកំពុងតែមើលងាយទាំងក្រុមហ៊ុន និង ពួកគេទាំងមូល។
២. និយាយដើមមេ ឬអ្នកធ្វើការ
រាប់តាំងពីថ្នាក់លើ ដល់ថ្នាក់ក្រោម ទោះអ្នកណាយ៉ាងម៉េច អ្នកមិនគួរលើកប្រធានបទនិយាយពីពួកគេនោះទេ ជាពិសេសមេឬចៅហ្វាយតែម្តង។ ធ្វើការជាក្រុម គួរតែចេះជួយជ្រោមជ្រែងគ្នាវិញ ទើបជាការប្រសើរ។
៣. និយាយរើសអើង
កន្លែងធ្វើការប្រមូលផ្តុំទៅដោយមនុស្សមកពីគ្រប់មជ្ឈដ្ឋាន គួរកុំនិយាយរើសអើង ឋានៈ មុខមាត់ ភេទ ជាតិសាសន៍ ឬ បក្សពួកនិយម។ ចុងក្រោយម្នាក់ៗសុទ្ធតែជាអ្នកធ្វើការឱ្យគេ ដូចតែគ្នា។
៤. សំណួររឿងផ្ទាល់ខ្លួន
បើគេមិននិយាយ គួរកុំសួរនៅចំណោមហ្វូង។ វាបង្ហាញពីការមិនគោរព និង មិនឱ្យតម្លៃ។ រឿងទាំងនោះមានដូចជា ទំនាក់ទំនងស្នេហា បញ្ហាសុខភាពសម្ងាត់ ជាពិសេសរឿងប្រាក់ខែ។
៥. ចង់រកកន្លែងការងារថ្មី
បើច្បាស់លាស់ចាំផ្តល់ដំណឹង បើចង់ចេញគួរកុំព្យាយាមបង្ហាញ។ ការនិយាយក្នុងន័យចង់រកកន្លែងការងារថ្មី មិនខុសពីការបង្ហាញថាខ្លួនមិនពេញចិត្តការងារសព្វថ្វៃនោះទេ។ ម្យ៉ាងវាធ្វើឱ្យប៉ះពាល់ដល់អារម្មណ៍អ្នក ដែលកំពុងធ្វើការជាមួយគ្នាផងដែរ៕
