កាលពីថ្ងៃទី ៤ ខែកញ្ញា ឆ្នាំ ២០២៥ កន្លងទៅ លោក ថាក់ស៊ីន ស៊ីណាវ៉ាត់ ត្រូវបានប៉ូលិសអន្តោប្រវេសន៍ ឃាត់ខ្លួនសាកសួរ ក្រោយពីឃើញថាបានឡើងយន្តហោះផ្ទាល់ខ្លួន បម្រុងនឹងហោះទៅក្រៅប្រទេស។
ក្នុងនោះ លោក ថាក់ស៊ីន បានដោះសាប្រាប់ប៉ូលិសថាលោកត្រូវទៅមន្ទីរពេទ្យនៅឯប្រទេសសិង្ហបុរីដើម្បីពិនិត្យសុខភាព ហើយសន្យាថានឹងត្រឡប់មកវិញនៅ ២ ថ្ងៃក្រោយ ទើបប៉ូលិសក៏បានអនុញ្ញាតឱ្យចេញទៅ។ យ៉ាងណាមិញ ក្រោយពីបានចេញដំណើរទៅ គេបែរជាឃើញថាយន្តហោះរបស់លោកមិនបានហោះទៅសិង្ហបុរីដូចជាការសន្យាឡើយ តែបែរជាទៅដល់ឌូបៃ ដែលជាកន្លែងដែលលោកធ្លាប់មានកន្លែងស្នាក់នៅ នៅទីនោះទៅវិញ។
យ៉ាងណាមិញ លោក ថាក់ស៊ីន ក៏បានបន្តដោះសាថា ដោយសារតែប៉ូលិសឃាត់ខ្លួនរហូតដល់ទៅ ២ ម៉ោង បណ្តាលឱ្យមានការយឺតយ៉ាវ និងយន្តហោះក៏មិនអាចចុះនៅព្រលានឯសិង្ហបុរីទាន់ ទើបលោកសម្រេចចិត្តហោះទៅឌូបៃវិញ ហើយកុំបារម្ភអី លោកនឹងត្រឡប់មកវិញឱ្យទាន់ការឡើងតុលាការនៅថ្ងៃទី ៩ ខែកញ្ញា ឆ្នាំ២០២៥ ខាងមុខនេះ៕
ប្រភព៖ Khaosod
