ប្រសិនបើជួបនាងនៅហាងនំ យើងអាចនឹងគិតថានាងជាបុគ្គលិកវ័យក្មេងម្នាក់ តែតាមធាតុពិត នាងគឺជាម្ចាស់ហាង ដែលមានអាយុទើបតែ ១៥ ឆ្នាំ និង ជាសិក្សកំពុងសិក្សានៅសាលាវេស្ទើនអន្តរជាតិ។
ជាក់ស្តែង តាមរយៈគណនី TikTok និង Instagram នាងមានឈ្មោះថា sojing_chan។ ហាងនំរបស់នាងមានឈ្មោះថា The Enchanted Chocolate ទើបបើកដំណើរការប៉ុន្មានខែនេះ មានទីតាំងនៅក្នុងបុរីប៉េងហួតបឹងស្នោ។
បើតាមវីដេអូដែលនាងរៀបរាប់អំពីការបើកអាជីវកម្មហាងនំ ពិតមែនទៅ មុនហាងនេះលេចចេញជារូបរាង នាងបានចាប់ផ្តើមធ្វើនំលក់តាំងពីអាយុ ១១ ឆ្នាំម្ល៉េះ។ អ្វីៗគឺផ្តើមចេញពីនាង ផ្តើមពីចំណុចសូន្យ ដោយមិនមានពឹងពាក់លើឪពុកម្តាយឡើយ។
នាងនិយាយថា ការធ្វើនំតែងតែជាអ្វីដែលនាងចូលចិត្តតាំងពីក្មេង។ វាចាប់ផ្តើមពីការបង្កើតកំហុសជាច្រើន ហើយរៀនពីវា មិនថាយ៉ាងណា នាងមិនដែលចុះចាញ់ឬបោះបង់ឡើយ។ ផ្តើមពីលុយត្រឹមតែ ៨០ ដុល្លារ នាងបានបន្តក្តីស្រលាញ់ និង ក្តីស្រមៃរហូតអាចបង្កើតហាងនំនេះបាន។
នាងលើកឡើងចុងក្រោយដែរថា ទោះមានលុយពីគ្រួសារ តែបើអ្នកមិនមានការបេ្តជ្ញាចិត្ត និង ក្តីស្រលាញ់ចំពោះអ្វីដែលអ្នកធ្វើ នាងធានាថាវាគ្មានអ្វីដែលស្ថិតស្ថេរឡើយ៕
