ក្មេងៗថ្នាក់មត្តេយ្យនៅចិនជាង ២០០​ នាក់ ធ្លាក់ខ្លួនឈឺព្រមគ្នា សង្ស័យមកពីអាហារថ្ងៃត្រង់នៅក្នុងសាលា

ថ្មីៗនេះ សិស្សថ្នាក់មតេ្តយ្យប្រមាណជាង ២០០ នាក់នៅក្នុងសាលាមួយកន្លែងនាប្រទេសចិន បានកើតអាការៈធ្លាក់ខ្លួនឈឺភ្លាមៗ ដោយអាជ្ញាធរបានរកឃើញថាមានជាតិសំណនៅក្នុងឈាមឡើងខ្ពស់ មូលហេតុបណ្តាលមកពីអាហារថ្ងៃត្រង់នៅក្នុងសាលា។

តាមព័ត៌មានបានឱ្យដឹងថា សាលាខាងលើនេះស្ថិតនៅក្នុងខេត្ត Gansu ប្រទេសចិន ដោយក្នុងនោះកុមារៗសិស្សថ្នាក់មត្តេយ្យប្រមាណជាង ២០០ នាក់ បានកើតអាការៈជ្រុះសក់ ឈឺពោះ ឈឺជើង និងបាត់បង់ចំណង់អាហារដូចៗគ្នា ដោយមិនដឹងមូលហេតុ។ ខាងគ្រូពេទ្យក៏បានពិនិត្យឃើញថា ក្មេងៗមាន​ជាតិ​សំណ​ក្នុង​ឈាម​លើស​កម្រិត​ស្តង់ដារ ទើបអាជ្ញាធរ និង អ្នកជំនាញឈានដល់ការចុះត្រួតពិនិត្យចំពោះករណីនេះ។

ចុងក្រោយនេះ អ្នកជំនាញបានរកឃើញជាតិសំណក្នុងសំណាក ២ ក្នុងចំណោម ២២៣ នៃអាហារថ្ងៃត្រង់របស់ក្មេងៗដែលនៅសាលា មានដូចជា នំខេក និងនំបុ័ងសាច់ក្រក ដែលក្នុងនោះវាមានកម្រិតសំណខ្ពស់ជាងកម្រិតស្តង់ដារចំនួន ២០០០ ដង ដែលបង្កហានិភ័យសុខភាពធ្ងន់ធ្ងរដល់ពួកគេ។ ក្នុងនោះ គេបានរកឃើញទៀតថា ជាតិសំណនេះ គឺមានប្រភពចេញមកពីថ្នាំលាបពណ៌ ដែលគេយកមកធ្វើអាហារឱ្យក្មេងៗ ទាំងដែលថ្នាំលាបនោះមិនមែនជារបស់សម្រាប់លាយក្នុងអាហារ។​

ដោយឡែក អ្នកពាក់ព័ន្ធចំនួន ៨ នាក់ ត្រូវបានគេឃាត់ខ្លួន ហើយអាជ្ញាធរកំពុងតែសួរនាំដល់នាយកសាលាផងដែរ។ ចំណែកក្មេងៗទាំង ២០១ នាក់ដែលបានធ្លាក់ខ្លួនឈឺ ក៏ត្រូវបានគេបញ្ជូនទៅព្យាបាលយ៉ាងដិតដល់ ដោយមិនឱ្យអាណាព្យាបាលអស់ថ្លៃចំណាយណាមួយឡើយ៕

ប្រភព៖ Khaosod