អាចថាជាសំណាងដ៏ធំ ដែលស្ត្រីម្នាក់រស់នៅរដ្ឋតិចសាស់ សហរដ្ឋអាមេរិក បានព្យាយាមជួយកូនអាយុ ៦ ឆ្នាំ ដែលកំពុងតែឈឺប៊ិះនឹងបាត់បង់ជីវិតទៅហើយ តែជាសំណាង នាងបានសង្គ្រោះកូនមកវិញ តាមរយៈការស្រាវជ្រាវនៅលើ Google។
ស្ត្រីរូបនេះមានឈ្មោះថា Casey Daniel កាលពីខែ មេសា កន្លងទៅ កូនរបស់នាងឈ្មោះ Witten មានអាការឈឺក្បាល និង វិលមុខ ហើយបានយកទៅមន្ទីរពេទ្យ។ ក្រោយត្រួតពិនិត្យ គ្រូពេទ្យបានប្រាប់នាងថា កូនរបស់នាងគ្រាន់តែកើតជំងឺផ្តាសាយធម្មតាប៉ុណ្ណោះ។ តែយ៉ាងណាមិញ មិនដល់ ២៤ ម៉ោងផង កូនរបស់នាងចាប់ផ្តើមដើរលែងរួច និយាយលែងកើត ហើយថែមទាំងពិបាកដកដង្ហើម បន្ទាប់មកក៏សន្លប់។
ភ្លាមៗនោះ គ្រូពេទ្យបានដាក់បំពង់អុកស៊ីហ្សែនដើម្បីឱ្យកូននាងបានដកដង្ហើមឡើងវិញ ហើយក៏ចាប់ផ្តើមធ្វើរោគវិនិច្ឆ័យជាថ្មី។ អ្វីដែលមិននឹកស្មានដល់ គ្រូពេទ្យបានរកឃើញករណីដ៏កម្រ ដែលកូនរបស់នាងកំពុងប្រឈមហានិភ័យដល់ស្លាប់ ដោយហេតុ មានបញ្ហាចង្កោមសរសៃឈាមនៅក្នុងខួរក្បាលបានលេចធ្លាយ។ គ្រូពេទ្យនិយាយទៀតថា ស្ថានភាពនេះពិតជាពិបាកខ្លាំង បើទោះជាព្យាបាលបាន ក៏កូនរបស់នាងក៏មិនអាចត្រលប់មកដូចដើមឡើយ ពោល គឺមិនអាចដើរបាន និង តម្រូវដាក់បំពង់អុកស៊ីហ្សែនដកដង្ហើម និង បញ្ចុកអាហារតាមទុយយោពេញមួយជីវិត។
ជាម្តាយ គ្រាន់តែគ្រូពេទ្យប្រាប់ដូចនេះ Casey នាងពិតជាស្រឡាំងកាំង។ នាងមិនដឹងចាប់ផ្តើមពីណាទៅណា ទីបំផុតនាងបានសាកល្បងបើក Google រួចស្រាវជ្រាវរកប្រភពវេបសាយអ្នកជំនាញៗ រហូតបានជួបអត្ថបទមួយសរសេរដោយ វេជ្ជបណ្ឌិត Dr. Jacques Morcos ឯកទេសខាងវះកាត់សរសៃប្រសាទ នៅមជ្ឈមណ្ឌល UTHealth Houston ដែលមានជំនាញលើស្ថានភាពកូនរបស់នាងតែម្តង។
នាងបានផ្ញើអ៊ីម៉ែលទៅកាន់វេជ្ជបណ្ឌិត ដោយសុំអង្វរឱ្យជួយកូនរបស់នាង ហើយទីបំផុតសំណើររបស់នាងក៏ត្រូវបានយល់ព្រម។ ភ្លាមៗពេលកូនរបស់នាងបានប្តូរទៅកាន់មន្ទីរពេទ្យថ្មី វេជ្ជបណ្ឌិតបានធ្វើការវះកាត់យ៉ាងឆាប់រហ័ស ដែលជាលទ្ធផលរយៈពេល ៤ ម៉ោង ការវះកាត់ប្រកបដោយជោគជ័យ។ ក្រោយសម្រាកជាច្រើនម៉ោង កូនរបស់នាងបានដឹងខ្លួនឡើងវិញ អាចនិយាយបាន និង ដកដង្ហើមបានជាថ្មី។
ប្រាំមួយសប្តាហ៍ក្រោយមក នាងបានយកកូនត្រលប់មកផ្ទះវិញ ជាមួយការអបអរខួបកំណើតអាយុ ៧ ឆ្នាំ និង ប្រើជីវិតរស់នៅមានសុខភាពល្អដូចធម្មតា៕
ប្រភព៖ NYP
