នៅម៉ោង ៣ ទាបភ្លឺ ឈានចូលថ្ងៃទី ២២ ខែឧសភា ឆ្នាំ ២០២៥ នេះ ក្រុមប៉ូលិសនៅថៃ បានបុកទៅចាប់ពិធីខួបកំណើតមួយ ចាប់បានក្មេងស្ទាវប្រុសស្រីជាង ៥០ នាក់ ហើយពិនិត្យទឹកនោមទៅឃើញសុទ្ធតែពណ៌ស្វាយ។
តាមព័ត៌មានបានឱ្យដឹងថា ប៉ូលិសបានចុះប្រតិបត្តិការចាប់ក្មេងស្ទាវទាំងអស់នៅក្នុងវីឡាលំហែមួយ នាស្រុក Bang Lamung ខេត្ត Chon Buri ក្រោយពីមានការរាយការណ៍ពីអ្នកជិតខាង ហើយឃាត់ខ្លួនមនុស្សទាំងអស់បានចំនួន ៥៥ នាក់ ក្នុងនោះមានប្រុស ២៦ នាក់ និង ស្រី ២៩ នាក់ ហើយក្នុងចំណោមនោះមានក្មេងអាយុក្រោម ១៨ ឆ្នាំចំនួន ១១ នាក់។
ប៉ូលិសបានរកឃើញថាក្រុមក្មេងស្ទាវទាំងនេះ បាននាំគ្នាជក់គ្រឿងញៀនយ៉ាងសប្បាយនៅក្នុងការជួបជុំនេះ ហើយប៉ូលិសក៏បានឱ្យធ្វើការត្រួតពិនិត្យសារធាតុញៀន ក៏ឃើញថាមានរហូតដល់ទៅ ៥០ នាក់ឯណោះ ដែលមានផ្ទុកសារធាតុញៀននៅក្នុងខ្លួន។ ដោយឡែក ប៉ូលិសបានឃាត់ខ្លួនអ្នកដែលមានសារធាតុញៀន រួមទាំងអ្នកដែលជាម្ចាស់គ្រឿងញៀនទាំងអស់ បញ្ជូនទៅកាន់ប៉ុស្តិ៍ប៉ូលិសដើម្បីធ្វើការចាត់ចែងទៅតាមផ្លូវច្បាប់ផងដែរ៕
ប្រភព៖ Khaosod
