ថ្មីៗនេះ មានករណីឃាតកម្មមួយនៅប្រទេសថៃ ដែលបង្កពីសិស្សសាលាថ្នាក់ទី ៧ ម្នាក់ ដោយបានយកកាំបិតទៅចាក់សម្លាប់មិត្តរួមសាលាម្នាក់ទៀតស្លាប់នៅកង់ទីន ព្រោះតែរឿងចងគំនុំតាំងពីថ្នាក់ទី ៤។
តាមព័ត៌មានបានឱ្យដឹងថា ហេតុការណ៍បានកើតឡើងនៅវេលាថ្ងៃត្រង់ កាលពីថ្ងៃទី ២២ ខែឧសភា ឆ្នាំ ២០២៥ កន្លងទៅ នៅសាលារៀនមួយកន្លែងនាស្រុក Phibun Mangsahan ខេត្ត Ubon Ratchathani។ ក្នុងនោះ ក្មេងប្រុសទាំងពីរមានវ័យ ១២ ឆ្នាំដូចគ្នា ដោយមុនកើតហេតុពួកគេបានណាត់វាយគ្នានៅកង់ទីន តែក្មេងប្រុសជាជនបង្កបានលួចដាក់កាំបិតទៅតាម ហើយក៏បានចាក់ក្មេងប្រុសជនរងគ្រោះអស់ចំនួន ៥ កាំបិត បង្កឱ្យមានការភ្ញាក់ផ្អើលដល់សិស្សសាលាផ្សេងទៀតយ៉ាងខ្លាំង។
ក្មេងប្រុសជនរងគ្រោះ ត្រូវបានលោកគ្រូអ្នកគ្រូបញ្ជូនទៅមន្ទីរពេទ្យ តែជាអកុសលគេបានដាច់ខ្យល់ស្លាប់នៅតាមផ្លូវ ចំណែកក្មេងប្រុសដែលជាជនបង្កក៏ត្រូវបានឃាត់ខ្លួនទុក ហើយគេបានសារភាពថា មូលហេតុនៃការចាក់សម្លាប់នេះ គឺដោយសារតែធ្លាប់មានគំនុំជាមួយនឹងជនរងគ្រោះតាំងពីរៀនថ្នាក់ទី ៤ មកម្ល៉េះ៕
ប្រភព៖ AMARINTV
