ឱ្យតែនិយាយដល់ក្រុមរាំ SPICY NAMES យុវវ័យប្រាកដជាស្គាល់ច្បាស់ ដែលក្រុមនេះតែងបង្ហាញការ dance cover បទចម្រៀង K-pop ជាមួយក្បាច់រាំលះមិនចាញ់ម្ចាស់ដើមឡើយ។
កន្លងមក ក្រុមនេះតែងបង្ហាញវត្តមាន dance cover នៅតាមកម្មវិធីនានា ជាពិសេស តែងបង្កើតការជួបជុំ random dance ឬរាំឆ្លាស់បទ ដើម្បីឱ្យយុវវ័យបានចូលរួមរាំលេងសប្បាយ។ ជាក់ស្តែង រៀងរាល់ថ្ងៃចុងសប្តាហ៍ ពួកគេនឹងបង្ហាញក្បាច់រាំនៅតំបន់ផ្លូវថ្មើរជើង Walk Street ជាកន្លែងដើរលម្ហែថ្មីដ៏ពេញនិយមនៅរាជធានីភ្នំពេញ។
បើតាមការតាមដានលើទំព័រហ្វេសប៊ុករបស់ក្រុម SPICY NAMES ក្រុមរាំដែលមានសមាជិកប្រុសស្រីសុទ្ធតែយុវវ័យនេះ ដំបូងឡើយបានបង្ហាញមុខជាមួយសមាជិក ៤ នាក់។ ក្រោយមកទៀតក៏បង្ហាញសមាជិកផ្លូវការចំនួន ៩ នាក់មកដល់សព្វថ្ងៃ។
ក្រុម SPICY NAMES ទទួលបានប្រជាប្រិយភាពខ្លាំង ជាមួយក្បាច់រាំរស់រវើក រាំលះស្រុះគ្នាល្អ សំខាន់សមាជិកម្នាក់ៗមានភាព Unique រៀងខ្លួន និង ស្រស់ស្អាតផងដែរ។ ក្រុមនេះធ្លាប់បានចូលប្រកួតក្នុងកម្មវិធីប្រកួតរាំ 2024 𝐊-𝐏𝐎𝐏 𝐖𝐨𝐫𝐥𝐝 𝐅𝐞𝐬𝐭𝐢𝐯𝐚𝐥- Cambodia Preliminary ដោយទទួលបានជ័យលាភីលេខ ២។
ក្រៅពីនេះ កាលពីដើមឆ្នាំ ២០២៥ ក្រុម SPICY NAMES ធ្លាប់បានចេញទៅសម្តែងនៅទីក្រុង Harbin ដែលជាទីក្រុងទឹកកកធំបំផុតលើពិភពលោកនៅប្រទេសចិន នៅក្នុងកម្មវិធី Dream of winter global promotional campaign 2025។
កាន់តែផ្ទុះការចាប់អារម្មណ៍ថែមទៀត រយៈក្រោយនេះ ក្រុម SPICY NAMES បានបង្ហាញវត្តមាននៅក្នុងការប្រគំតន្ត្រីធំៗរបស់តារាចម្រៀងជួរមុខនៅកម្ពុជាដូចជា ព្រឹត្តិការណ៍ប្រគំតន្ត្រី THE Q – RISE OF THE QUEEN របស់តារាចម្រៀង ឱក សុគន្ធកញ្ញា និង ការប្រគំតន្រ្តីដ៏អស្ចារ្យ «ត្រីវិស័យសុវណ្ណភូមិ» ជាដើម៕
