អ្នកគាំទ្រតាមដានពីផេកផ្លូវការរបស់លោក N.John កូនប្រុសទី ២ របស់ឧកញ៉ា ព្រាប សុវត្ថិ ដែលកំពុងបន្តក្តីស្រមៃក្នុងវិស័យសិល្បៈនៅឯសហរដ្ឋអាមេរិកច្បាស់ជាបានជ្រាបហើយថា កាលពីពេលថ្មីៗនេះ ក្រោយការប្រកាសចេញចម្រៀងថ្មី លោកបានរងការបញ្ចេញមតិវែកញែកជាថ្មី ពាក់ព័ន្ធនឹងពេលវេលាមិនសមស្រប ខណៈព្រំដែនកម្ពុជាកំពុងឡើងកម្តៅជាថ្មីជាមួយនឹងប្រទេសថៃ។
តែយ៉ាងណាមិញ ចម្រៀងថ្មី មានចំណងជើងថា «Feel Like This» បានចេញជា Audio ហើយ កាលពីថ្ងៃទី ២៦ ខែកញ្ញា ឆ្នាំ ២០២៥ កន្លងទៅនេះ និង ត្រៀមចេញ MV ក្នុងពេលឆាប់ៗផងដែរ។
ងាកទៅកាន់ ឧកញ៉ា ព្រាប សុវត្ថិ ឯណោះវិញ ក្រោយពីកូនបានបញ្ចេញស្នាដៃថ្មីក្នុងនាមជាតារាជ្រកក្រោមវិស័យតន្ត្រីនៅឆាកអន្តរជាតិនោះ ក្នុងនាមជាឪពុកបានបង្ហាញអារម្មណ៍យ៉ាងរំភើបថា «លោកពុក ចង់មើល MV ចេញឆាប់ៗ»។
លើសពីនោះ អ្វីដែលគួរឱ្យចាប់អារម្មណ៍ ឧកញ៉ា ព្រាប សុវត្ថិ ក៏បានបង្ហាញអារម្មណ៍អរគុណទៅកាន់អ្នកគាំទ្រ និង មិត្តក្នុងសិល្បៈដូចគ្នា អំឡុងពេលកូនប្រុសបញ្ចេញចម្រៀងម្តងៗតែមានការបញ្ចេញមតិវិជ្ជមាន និង អវិជ្ជមាន។
ជាក់ស្តែង គេបានឃើញ ឧកញ៉ា ព្រាប សុវត្ថិ បានឆ្លើយតបនូវការបញ្ចេញមតិមួយរបស់តារាចម្រៀង លោក យ៉ែម សំអូន ដែលបានចូលទៅសរសេរក្រោយការបង្ហោះរបស់ឧកញ៉ា ព្រាប សុវត្ថិ ថា៖ «នេៈជាមោទកភាពខ្លាំងណាស់ របស់សិល្បៈនៃមុខមាត់ប្រទេសកម្ពុជា។ ពូពិតជារំភើបណាស់កូន! សូមឱ្យក្មួយជោគជ័យណាក្មួយ»។ ភ្លាមនោះដែរ ឧកញ៉ា ព្រាប សុវត្ថិ បានឆ្លើយតប ដែលលោក យ៉ែម សំអូន បានយល់ពីកូនប្រុសថា៖ «Samonn Yem អរគុណប្អូនប្រុស ដែលបានយល់ និង លេីកទឹកចិត្តពីការងារសិល្បៈរបស់កូនប្រុសបង ។ បងពិតជារំភេីប និង អរគុណប្អូនប្រុសខ្លាំងណាស់ សម្រាប់ជាការផ្ដល់កម្លាំងចិត្តមួយនេះ ជូនពរប្អូនប្រុស និង គ្រួសារជួបតែក្ដីសុខ និង ទទួលជោគជ័យគ្រប់ការងារ»៕
