ប្រិយមិត្តអ្នកគាំទ្រជីវិតឯកជនរបស់អ្នកសិល្បៈ ភាគច្រើនសុទ្ធតែបានជ្រាបហើយថា ប៉ុន្មានថ្ងៃចុងក្រោយនេះ រឿងរ៉ាវរបស់កំពូលតារាចម្រៀង មាស សុខសោភា និង ស្វាមី កំពុងក្លាយជាប្រធានបទក្ដៅគគុក ដោយស្វាមីអ្នកនាងបានបង្ហោះសាររៀបរាប់ពីជីវិតគ្រួសារហាក់កំពុងជួបភាពរកាំរកូស ចំណែកឯអ្នកនាង មាស សុខសោភា ក៏បានឡាយវីដេអូបកស្រាយនូវទុក្ខលំបាកធ្លាប់ឆ្លងកាត់ក្នុងជីវិតអាពាហ៍ពិពាហ៍ជាង ១០ ឆ្នាំមកនេះ។
ក្នុងការឡាយវីដេអូបកស្រាយរបស់កំពូលតារាចម្រៀង មាស សុខសោភា កាលពីថ្ងៃទី ៨ ខែឧសភា ឆ្នាំ ២០២៥ កន្លងមកនេះ ឃើញថាមានមហាជនជាច្រើនបានសម្ដែងការសោកស្ដាយ និង លើកទឹកចិត្តដល់អ្នកនាងចំពោះរឿងរ៉ាវដែលបានកើតឡើង ដោយឡែកក្នុងនោះក៏មានមហាជនមួយចំនួនបានប្រតិកម្ម រិះគន់ ក៏ដូចជាស្ដីបន្ទោសដល់អ្នកនាង មាស សុខសោភា ដែរ។
ខណៈរឿងមួយនេះបានធ្វើឱ្យមហាជនចាប់អារម្មណ៍កាន់តែខ្លាំង ធ្វើឱ្យសិល្បករជាច្រើនដែលស្រឡាញ់រាប់អានកំពូលតារាចម្រៀងស្រីរូបនេះកន្លងមក បានចេញមុខបង្ហោះរូបភាព និង សារជាច្រើន ក្នុងន័យការពារអ្នកនាង មាស សុខសោភា និង សុំចិត្តមហាជនកុំស្ដីបន្ទោសដល់អ្នកនាងឡើយ ព្រោះថាអ្នកនាងកំពុងមានបញ្ហាស្រាប់ទៅហើយ មិនគួរនាំគ្នាស្ដីបន្ទោសថែមទៀតនោះទេ គួរតែនាំគ្នាលើកចិត្តល្អទើបប្រសើរ។
ងាកមកលោក សេន រ៉ានុត ដែលជាអតីតតារាចម្រៀងរៀមច្បងមួយរូបធ្លាប់ជាមិត្តចាស់នឹងអ្នកនាង មាស សុខសោភា ក៏បានបង្ហោះរូបភាពរបស់ពួកគេមួយសន្លឹក ព្រមទាំងរៀបរាប់នូវពាក្យពេចន៍មួយចំនួនដែរថា ៖ «សេចក្តីសុខសំខាន់! បើយើងមិនចេះរកសេចក្តីសុខឱ្យខ្លួនឯង គ្មាននរណារកឱ្យយើងនោះទេ»។ ដ្បិតថាពេលនេះ លោក សេន រ៉ានុត បានផ្ដាច់ខ្លួនពីអាជីពសិល្បៈ ហើយទៅរស់នៅសហរដ្ឋអាមេរិក ប៉ុន្ដែទឹកចិត្តរាប់អានមិត្តភក្ដិចាស់ គឺមិនប្រែប្រួលឡើយ៕
