កាលពីថ្ងៃទី ១៦ ខែកក្កដា ឆ្នាំ ២០២៥ កន្លងទៅនេះ តាមសារព័ត៌មានរបស់ថៃបានឱ្យដឹងថា មាននាយទាហានថៃចំនួន ៣ នាក់ បានដើរជាន់មីនខណៈកំពុងល្បាតនៅតំបន់មុំបី បណ្តាលឱ្យរបួសដាច់ជើងចំនួន ១ នាក់ រីឯ ២ នាក់ទៀតរងរបួសស្រាល។
តាមព័ត៌មានបានឱ្យដឹងថា ក្រុមល្បាតទាំងអស់មានចំនួន ១៤ នាក់ ក្នុងនោះមានទាហានល្បាតព្រៃចំនួន ២ នាក់ ក្រុម RDF ចំនួន ៦ នាក់ និង ទាហានវិស្វករចំនួន ៦ នាក់។ ក្រុមនេះបាននាំគ្នាដើរល្បាតពីតំបន់មុំបី ទៅកាន់ភ្នំ ៤៨១ លុះមកដល់ទីតាំង WA 220 861 ស្រាប់តែមានការដើរជាន់មីន បណ្តាលឱ្យមានទាហាន ៣ នាក់បានរងរបួស ហើយក៏ត្រូវបានគេបញ្ជូនទៅកាន់មន្ទីរពេទ្យ។
ដោយឡែក ក្នុងនោះមានទាហានមួយរូបរងរបួសធ្ងន់ បានដាច់ជើងម្ខាង រីឯទាហាន ២ នាក់ទៀត មានអាការណែនទ្រូង ចុកទ្រូង និង ហ៊ឹងត្រចៀក ហើយពេលនេះកំពុងតែត្រូវខាងគ្រូពេទ្យសង្រ្គោះ និង តាមដានដោយយកចិត្តទុកដាក់៕
ប្រភព៖ Khaosod
