កាលពីថ្ងៃទី ៣១ ខែឧសភា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេសប្រជាជនកម្ពុជាមានការក្តុកក្តួលយ៉ាងខ្លាំង ក្រោយពីឃើញសំណេររបស់យោធិនមួយរូប ដែលកំពុងឈរជើងការពារព្រំដែននៅតំបន់មុំបី បានបង្ហោះសារមិនទាន់ដង្ហើមចុងក្រោយរបស់ភរិយា និង កូន។
តាមរយៈសំណេរពីយោធិន ដែលមានឈ្មោះថា គឹម សារិ បានរៀបរាប់ថា ៖ «បងសុំទោស ពេលអូនឈឺបងបានត្រឹមតែសួរសុខទុក្ខអូនតាមវីដេអូខល តែពេលនេះអូនបានលាបង និង កូនរហូតហើយ ទាំងបងទៅមិនទាន់ដង្ហើមអូនជាលើកចុងក្រោយ ព្រោះបងជាប់បំពេញកាតព្វកិច្ចការងារនៅព្រំដែន។ សូមដួងវិញ្ញាណក្ខន្ធអូន ទៅកាន់សុគតិភព កើតជាតិណាៗកុំឱ្យអភ័ព្វដូចជាតិនេះទៀត។ បាទបើបងប្អូនចង់ចូលរួមរំលែកទុក្ខ ឬក៏ជាបច្ច័យចូលបុណ្យសពប្រពន្ធខ្ញុំបាទ តាមរយៈលេខទូរស័ព្ទ និង កុងរបស់ខ្ញុំបាទ 0885550856/0888110181»។
ងាកមកកាន់មហាជន ក្រោយទទួលបានដំណឹងដ៏សោកសៅខាងលើនេះហើយ ក៏មានការចូលរួមរំលែកទុក្ខ និង បានចូលបច្ច័យជូនដល់ក្រុមគ្រួសារយោធិនខាងលើផងដែរ។ លើសពីនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានចាត់ឱ្យសហការីចូលរួមរំលែកទុក្ខយ៉ាងក្រៀមក្រំបំផុត និង នាំយកថវិកា ២០ លានរៀលផងដែរ។
គួរជម្រាបថា លោក គឹម សារិ ជាអនុសេនីយ៍ត្រី បានបាត់បង់ភរិយា ខណៈលោកកំពុងបំពេញភារកិច្ចប្រចាំការនៅតំបន់មុំបី ដោយភរិយាមានរោគាពាធ និង កំពុងសម្រាកនៅមន្ទីរពេទ្យ ដោយកំពុងពពោះកូនក្នុងផ្ទៃ ៧ ខែ។ ជាអកុស ភរិយារបស់លោក គឺលោកស្រី អាំ រត្តនាង បានទទួលមរណភាពទាំងកូនក្នុងផ្ទៃ ដោយបន្សល់ទុកនូវកូនៗចំនួន ៣ នាក់ទៀត ក្នុងនោះ ប្រុស ២ នាក់ អាយុ ១៥ ឆ្នាំ, ១១ ឆ្នាំ និង កូនស្រីអាយុ ៤ ឆ្នាំ។ បច្ចុប្បន្ន អនុសេនីយ៍ត្រី គឹម សារិ បានជួបជុំក្រុមគ្រួសារ និង កំពុងរៀបចំពិធីបុណ្យសពភរិយាតាមប្រពៃណីផងដែរ៕
