បើនិយាយដល់ខ្សែភាពយន្តភាគល្បីៗបានចាក់បញ្ចាំងតាមកញ្ចក់ទូរទស្សន៍នានា ដែលមហាជននិយមទស្សនានោះ ច្បាស់ជាធ្លាប់បានស្គាល់មកហើយ លោក យឹម សម្បត្តិ តួឯកប្រុសស្រស់សង្ហាមួយរូប ក្នុងចំណោមតារាសម្តែងប្រុសដទៃ មានប្រជាប្រិយភាពកាលពីអំឡុងឆ្នាំ ២០១០ ឡើង។
យ៉ាងណាមិញ បើគិតមកដល់ពេលនេះ រយៈពេលជាច្រើនឆ្នាំហើយដែរ ដែលតារាសម្តែងប្រុស យឹម សម្បត្តិ បានរយាលពីសិល្បៈពុំសូវបានបង្ហាញវត្តមានសម្តែងក្នុងខ្សែភាពយន្តដូចមុនឡើយ ដោយកាលពីអំឡុងឆ្នាំ ២០១៨ លោក យឹម សម្បត្តិ មានជំងឺក្រពះពោះវៀន មិនអាចចេញសម្តែងបាន។ ដោយឡែក ប៉ុន្មានឆ្នាំចុងក្រោយនេះ អ្នកគាំទ្រ ក៏បានឃើញវត្តមានរបស់លោក យឹម សម្បត្តិ ក្នុងថតពាណិជ្ជកម្មផលិតផលមួយចំនួន និង កំពុងមមាញឹកក្នុងអាជីពរកស៊ីផ្ទាល់ខ្លួន ជាថៅកែហាងលក់ម្ហូបអាហារ។
ងាកទៅកាន់ជីវិតឯកជនឯណោះវិញ បើគិតមកដល់ពេលនេះ រយៈពេលប្រមាណជា ១៣ ឆ្នាំ ហើយ ដែលតារាសម្តែងប្រុស លោក យឹម សម្បត្តិ បានបញ្ចប់ភាពនៅលីវ រៀបការសាងគ្រួសារជាមួយនឹងភរិយាដ៏ស្រស់សោភា។ ក្នុងនោះ លោក និង ភរិយា ក៏ទទួលបានចំណងដៃកូនស្រីចំនួន ២ នាក់ ហើយដែរ ដោយកូនស្រីច្បងធំទន្ទឹមប៉ាម៉ាក់ទៅហើយ។
គួររំឭកថា លោកយីម សម្បត្តិ ធ្លាប់ជាតារាសម្តែងប្រុសមួយរូប ឈ្នះពានរង្វាន់ធំបំផុត គឺរង្វាន់ «Best Actor» នៅអាមេរិក ក្នុងមហោស្រពភាពយន្ត New York City Indie Film ពីការសម្តែងរឿង «មួយថ្ងៃនៅជនបទ» របស់ផលិតកម្មខ្មែរមេគង្គ កាលពីអំឡុងឆ្នាំ ២០១៦៕
