នៅក្នុងឆ្នាំ ២០២៤ អ្នកឧកញ៉ា គិត ម៉េង ដែលគ្រប់គ្នាស្គាល់ថាជាសេដ្ឋីវាល់លាននៅស្រុកខ្មែរ ហាក់ទទួលបានសមិទ្ធផលជាបន្តបន្ទាប់ មិនថាការធ្វើអាជីវកម្ម ក៏ដូចជាក្រុមគ្រួសារទាំងមូល។ ជាក់ស្តែង ថ្មីៗនេះ នៅលើទំព័រហ្វេសប៊ុក អ្នកឧកញ៉ាបានបង្ហោះសាររៀបរាប់សមិទ្ធផលសំខាន់ៗសម្រាប់គ្រួសារ ខណៈដែលសល់តែប៉ុន្មានថ្ងៃទៀតប៉ុណ្ណោះ ឆ្នាំ ២០២៤ នឹងត្រូវបានបញ្ចប់ឈានចូលឆ្នាំថ្មី ឆ្នាំសកល ២០២៥។
អ្នកឧកញ៉ាបានសរសេររៀបរាប់ ដោយភ្ជាប់ជាមួយរូបភាពយ៉ាងដូច្នេះថា៖ «ខណៈឆ្នាំ២០២៤ ជិតបិទបញ្ចប់ ខ្ញុំកៀងអារម្មណ៍ ហើយជញ្ជឹងអំពីព្រឹត្តិការណ៍ និង បទពិសោធដ៏អស្ចារ្យក្នុងឆ្នាំនេះ ដែលពោរពេញដោយសមិទ្ធផលសំខាន់ៗសម្រាប់គ្រួសារយើង។
ភរិយារបស់ខ្ញុំបានកាន់តួនាទីជាប្រធានសមាគមសិល្បករខ្មែរ ដែលជាតួនាទីមួយថ្មី និង ធ្វើឱ្យយើងរំភើបចិត្ត។ នេះជាមុខតំណែងដែលគាត់រមែងចង់បំពេញ។ កូនៗរបស់យើងបន្តលូតលាស់ទាំងរូបរាងកាយ និង ប្រាជ្ញាស្មារតីបានល្អ។ កូនប្រុសច្បងរបស់យើង ស៊ូឡា បានបញ្ចប់ការសិក្សាថ្នាក់ខ្ពស់ ហើយបច្ចុប្បន្ននេះ កំពុងចូលរួមកាន់តែច្រើននៅក្នុងធុរកិច្ចគ្រួសាររបស់យើង។ កូនស្រីទីពីររបស់យើងឈ្មោះ ស៊ូរៀ ទើបឈានចូលវ័យ ១៨ ឆ្នាំ និង កំពុងក្លាយជាមនុស្សពេញវ័យ។ ចំណែកកូនពៅរបស់យើងពីរនាក់ទៀតគឺ ស៊ូណាវីន និង ស៊ូឡុង កំពុងតែធំធាត់ពីមួយថ្ងៃទៅមួយថ្ងៃទៅតាមរបៀបរបបរស់នៅរបស់ពួកគេ។
ចំពោះអាជីពវិញ យើងមានការបណ្តាក់ទុនជោគជ័យមួយចំនួន និង ការបើកដំណើរការអាជីវកម្មថ្មីៗជាច្រើនដ៏គួរឱ្យរំភើបរីករាយ ដែលធ្វើឱ្យឆ្នាំនេះជាឆ្នាំនៃវឌ្ឍនភាព និង សមិទ្ធផលសម្រាប់យើងទាំងអស់គ្នា។
ខ្ញុំពិតជាមានអំណរគុណយ៉ាងជ្រាលជ្រៅ ព្រោះថាឆ្នាំនេះពិតជាឆ្នាំដែលយើងចងចាំ ហើយយើងរង់ចាំស្វាគមន៍ឆ្នាំ ២០២៥ ជាមួយនឹងក្តីសង្ឃឹម និង ព្រឹត្តិការណ៍សំខាន់ៗជាច្រើនទៀត។ ឆ្នាំ២០២៤ ពិតជាឆ្នាំមួយដែលយើងបំភ្លេចមិនបាន!»៕
