មហាជនដែលស្រលាញ់គាំទ្រ និង តាមដាន លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រាកដជាបានដឹង បានឃើញរួចមកហើយថា ជារឿយៗលោកជំទាវបណ្ឌិត តែងតែសកម្មក្នុងវេទិកាចែករំលែក ជាពិសេស វេទិកាសម្រាប់យុវតីជំនាន់ក្រោយ ខណៈដែលលោកជំទាវជាអគ្គស្នងការសមាគមកាយឫទ្ធិនារីកម្ពុជា។ ជាក់ស្តែង ថ្មីៗនេះ តាមរយៈបណ្តាញសង្គមហ្វេសប៊ុក លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានបង្ហាញពីក្តីរំពឹងរបស់លោកជំទាវចំពោះយុវតី និង យុវជនជំនាន់ក្រោយផងដែរ។
បង្ហោះភ្ជាប់មកជាមួយរូបភាព លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានសរសេរថា៖ ក្តីរំពឹងរបស់នាងខ្ញុំចំពោះយុវតី យុវជនជំនាន់ក្រោយគឺ «ក្លាយជាធនធានល្អរបស់សង្គម មិនមែនជាបន្ទុកដល់សង្គម»។ យ៉ាងណាមិញ នៅក្នុងរូបភាពនេះ ក៏បានលម្អិតក្តីរំពឹងចំនួន ៤ ដែលជាអនុសាសន៍របស់លោកជំទាវបណ្ឌិត គឺ ទី ១ មិនបង្កភាពអវិជ្ជមានដល់សង្គម, ទី ២ ខិតខំកសាងសមត្ថភាព និង ចំណេះជំនាញឱ្យបានច្បាស់លាស់, ទី ៣ មានសីលធម៌ គុណធម៌ សុជីវធម៌ថ្លៃថ្នូរ, និង ទី ៤ ចេះចែករំលែកចំណេះដឹង ជួយការងារសង្គម និង បណ្តុះស្មារតីស្រលាញ់ជាតិ។
គួរឱ្យដឹងដែរថា លោកជំទាវបណ្ឌិត ពេជ ចន្ទមុន្នី ជាជំទាវទី ១ ដំបូងគេនៅកម្ពុជា ដែលបានបញ្ចប់ការសិក្សាថ្នាក់បណ្ឌិតនៅឯចក្រភពអង់គ្លេស និង មានជំនាញផ្នែកសុខភាពសាធារណៈ។ បើទោះលោកជំទាវបណ្ឌិត ប្រសូតនៅក្នុងត្រកូលបញ្ញវន្ត និង មានជីវភាពសមរម្យ ហើយក្រោយមក ក៏ក្លាយជាបញ្ញវន្តជាន់ខ្ពស់ មានឪពុកក្មេកជានាយករដ្ឋមន្រ្តី រហូតដល់ស្វាមីក្លាយជានាយករដ្ឋមន្រ្តីក៏ដោយ ក៏លោកជំទាវបណ្ឌិត នៅតែរក្សាបានចរិយាសម្បត្តិ សុភាព រាបសា រួសរាយ រាក់ទាក់ និង បន្តធ្វើការងារសង្គម និង មនុស្សធម៌ជាធម្មតា ដោយគ្មានការរើសអើង និង ប្រកបដោយការទទួលខុសត្រូវ៕
