នៅថ្ងៃទី ១០ ខែមីនា ឆ្នាំ ២០២៥ នេះ តាមរយៈសារព័ត៌មានក្នុងស្រុក បានបញ្ជាក់ឱ្យបានដឹងថា អង្គភាពប្រឆាំងអំពើពុករលួយ (ACU) បានចាប់ខ្លួនអភិបាលរងខេត្តកំពង់ស្ពឺ លោក ទិត វុទ្ធី រួមជាមួយមនុស្ស ២ នាក់ទៀត ពាក់ព័ន្ធបោកប្រាស់លុយអ្នកវិនិយោគជនជាតិចិន ៤០ ម៉ឺនដុល្លារ ខណៈជនជាប់ចោទទាំង ៣ នាក់ ត្រូវតុលាការខេត្តកំពង់ស្ពឺ ចេញដីកាឃុំខ្លួនដាក់ពន្ធនាគារ កាលពីថ្ងៃទី ៩ ខែមីនា ឆ្នាំ ២០២៥។
តាមប្រភពព័ត៌មានបានបញ្ជាក់ថា លោក ទិត វុទ្ធី និង បក្ខពួក ត្រូវបាន ACU ចាប់ខ្លួន ដោយសារស៊ីដាច់លុយចិន ៤០ ម៉ឺនដុល្លារ រឿងរត់អាជ្ញាបណ្ណរ៉ែ តែមិនបានសម្រេច ខណៈក្រោយការចាប់ខ្លួន និង ចោទប្រកាន់ពីតំណាងអយ្យការ ពួកគេទាំង ៣ នាក់ ត្រូវបានតុលាការ សម្រេចឃុំខ្លួនដាក់ពន្ធនាគារតែម្តង។
ក្នុងនោះជនជាប់ចោទទាំង ៣ នាក់ ត្រូវបានសាលាដំបូងខេត្តកំពង់ស្ពឺ សម្រេចចោទប្រកាន់រួមមាន៖
ទី១៖ ឈ្មោះ ទិត វុទ្ធី ភេទប្រុស អាយុ ៥៦ ឆ្នាំ កើតថ្ងៃទី ០៧ ខែមករា ឆ្នាំ ១៩៦៩ (ឃាត់ខ្លួន)
ទី២៖ ឈ្មោះ ហ៊ាវ ខន ហៅតង ភេទប្រុស អាយុ ៤៥ ឆ្នាំ (ឃាត់ខ្លួន) ពីបទ រំលោភអំណាច, ក្លែងបន្លំ, ប្រើប្រាស់លិខិតក្លែង, ក្លែងឯកសារសាធារណៈ និង ប្រើប្រាស់ឯកសារ សាធារណៈក្លែង ប្រព្រឹត្តនៅចំណុចក្នុងខេត្តកំពង់ស្ពឺ, ខេត្តប៉ៃលិន, ខេត្តបាត់ដំបង, ខេត្តស្ទឹងត្រែង និង ខេត្តព្រះវិហារ កាលពីអំឡុងឆ្នាំ ២០២៣
ទី៣៖ ឈ្មោះ ម៉ឹង សារឿន (ឈ្មោះជាភាសាចិន អ៊ុង វិនឆាយ) ភេទប្រុស អាយុ ៤៤ ឆ្នាំ (ឃាត់ខ្លួន) ពីបទសមគំនិតក្នុងអំពើរំលោភអំណាច, ក្លែងបន្លំ, ប្រើប្រាស់លិខិតក្លែង, ក្លែងឯកសារសាធារណៈ និង ប្រើប្រាស់ឯកសារសាធារណៈក្លែង ប្រព្រឹត្តនៅចំណុចខេត្តកំពង់ស្ពឺ ខេត្តប៉ៃលិន, ខេត្តបាត់ដំបង, ខេត្តស្ទឹងត្រែង និង ខេត្តព្រះវិហារ កាលពីអំឡុងឆ្នាំ ២០២៣៕
ប្រភព ៖ Fresh News
