ក្ដៅៗ! ស្នងការខេត្តកណ្ដាល ឱ្យម្ចាស់គណនី Ka Green ចូលខ្លួនបំភ្លឺបន្ទាន់ និង ធ្វើវីដេអូសុំទោស ជុំវិញការថតក្បួនរថយន្តប្រតិភូបង្ហោះប្រើពាក្យសម្ដីមិនសមរម្យ

នៅរសៀលថ្ងៃទី ១៥ ខែកក្កដា ឆ្នាំ ២០២៥ នេះ ស្នងការដ្ឋាននគរបាលខេត្តកណ្ដាល បានចេញសេចក្តីបំភ្លឺព័ត៌មានឱ្យបានដឹងថា ក្រុមការងារព័ត៌មាន និង ប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានបំភ្លឺជូនសាធារណជនទៅនឹងផេកហ្វេសប៊ុកឈ្មោះ Ka Green ដែលបានថតក្បួនរថយន្តប្រតិភូ ស្នងការដ្ឋាននគរបាលខេត្តកណ្តាល ក្នុងភូមិសាស្រ្តខេត្តកំពង់ធំ និង បង្ហោះដោយប្រើពាក្យសម្ដីអសីលធម៌ ជេរប្រមាថមកលើថ្នាក់ដឹកនាំ និង ក្បួនប្រតិភូ។

ក្នុងនោះ ស្នងការដ្ឋាននគរបាលខេត្តកណ្ដាល បានបញ្ជាក់ឱ្យដឹងថា ក្បួនខាងលើ គឺជាក្បួនប្រតិភូ នៃស្នងការដ្ឋាននគរបាលខេត្តកណ្តាល ដែលបានអញ្ជើញត្រឡប់ពីការអញ្ជើញសំណេះសំណាល សួរសុខទុក្ខ នាំយកសម្ភារ បរិក្ខារ គ្រឿងឧបភោគបរិភោគ ឱសថ និង ថវិកា ផ្តល់ជូនគណៈបញ្ជាការនគរបាលជាតិប្រចាំទិសភូមិភាគទី ៤ ខេត្តព្រះវិហារ។

ពាក់ព័ន្ធករណីនេះ ស្នងការដ្ឋាននគរបាលខេត្តកណ្ដាល ជូនដំណឹងឱ្យម្ចាស់គណនីផេកហ្វេសប៊ុកឈ្មោះ Ka Green ត្រូវចូលខ្លួនមកបំភ្លឺជាបន្ទាន់ និង ធ្វើវីដេអូ សុំទោសចំពោះទង្វើដែលបានប្រមាថមកលើថ្នាក់ដឹកនាំ និង ប្រតិភូនៃស្នងការដ្ឋាននគរបាលខេត្តកណ្តាល៕

ប្រភព ៖ ស្នងការដ្ឋាននគរបាលខេត្តកណ្ដាល