ក្ដៅៗ! ក្រសួងសុខាភិបាល ណែនាំ ៧ ចំណុច ដើម្បីការពារសុខភាព ពីការប្រែប្រួលគុណភាពខ្យល់ក្នុងបរិយាកាស

នៅព្រឹកថ្ងៃទី ២៥ ខែមករា ឆ្នាំ ២០២៥ នេះ ក្រសួងសុខាភិបាល បានចេញសេចក្ដីជូនដំណឹង ស្តីពីការការពារសុខភាព បណ្តាលមកពីការប្រែប្រួលគុណភាពខ្យល់ក្នុងបរិយាកាស ដែលយោងតាមក្រសួងបរិស្ថាន នាពេលថ្មីៗនេះ និង ជាបន្តបន្ទាប់ បង្ហាញថាសន្ទស្សន៍គុណភាពខ្យល់ មានការប្រែប្រួលខុសៗគ្នា ទៅតាមភូមិសាស្ត្រ ពីខេត្តមួយទៅខេត្តមួយ។

អាស្រ័យហេតុនេះ ក្រសួងសុខាភិបាលបានណែនាំឱ្យសាធារណជនទាំងអស់ តាមដានសន្ទស្សន៍គុណភាពខ្យល់ដោយយកចិត្តទុកដាក់ និង ការពារសុខភាពខ្លួន និង សមាជិកក្រុមគ្រួសារឱ្យបានហ្មត់ចត់បំផុត ដោយអនុវត្តតាមវិធានការ ៧ ចំណុច ដូចខាងក្រោម៖

១. បន្តតាមដានស្ថានភាពគុណភាពខ្យល់តាមរយៈប្រព័ន្ធផ្សព្វផ្សាយ ឬគេហទំព័ររបស់ក្រសួងបរិស្ថាន (https://airquality.moe.gov.kh) ដើម្បីដឹងអំពីសន្ទស្សន៍គុណភាពខ្យល់នៅក្នុងភូមិសាស្ត្រដែលអ្នករស់នៅ

២. ស្នាក់នៅក្នុងផ្ទះ ក្នុងអំឡុងពេលដែលសន្ទស្សន៍គុណភាពខ្យល់ខ្ពស់ (ពណ៌ក្រហម) ឬខ្ពស់ខ្លាំង (ពណ៌ស្វាយ) ឬបរិយាកាសអ័ព្ទអួដោយសារមានការកើនឡើងនូវកំហាប់សារធាតុបំពុលខ្យល់

៣. បិទបង្អួច និង ទ្វារ ដើម្បីបង្ការខ្យល់មិនល្អពីខាងក្រៅចូលក្នុងផ្ទះរបស់លោកអ្នក

៤. កាត់បន្ថយសកម្មភាពខាងក្រៅផ្ទះ ឬនៅទីវាល ក្នុងអំឡុងពេលដែលសន្ទស្សន៍គុណភាពខ្យល់ខ្ពស់ និង ខ្ពស់ខ្លាំង ឬពាក់ម៉ាសក្នុងករណីចាំបាច់

៥. ទទួលទានទឹកឱ្យបានគ្រប់គ្រាន់

៦. ត្រូវយកចិត្តទុកដាក់ការពារជាពិសេសចំពោះ ទារក កុមារ ស្ត្រីមានផ្ទៃពោះ ជនចាស់ជរា អ្នកមានជំងឺសួត ជំងឺសរសៃឈាមបេះដូង និង ជំងឺរ៉ាំរ៉ៃ ដែលជាក្រុមងាយរងគ្រោះ

៧. ប្រសិនបើមានរោគសញ្ញាផ្លូវដង្ហើមដូចជា ពិបាកដកដង្ហើម ក្អក ហត់ សូមលោកអ្នកប្រញាប់ទៅកាន់ មណ្ឌលសុខភាព ឬមន្ទីរពេទ្យដែលនៅជិតផ្ទះលោកអ្នក៕

សូមអានសេចក្ដីលម្អិតនៅខាងក្រោម ៖