នៅរសៀលថ្ងៃទី ០៨ ខែសីហា ឆ្នាំ ២០២៥ នេះ តាមរយៈអ្នកនាំពាក្យកងរាជអាវុធហត្ថលើផ្ទៃប្រទេស បានជម្រាបជូនសាធារណជន អ្នកសារព័ត៌មាន និង បុគ្គលពាក់ព័ន្ធមេត្តាជ្រាបថា ករណីមេបញ្ជាការរងកងរាជអាវុធហត្ថខេត្តសៀមរាប ឈ្មោះ ចាន់ ឃុង បានប្រើហិង្សាលើស្ត្រីនៅខារ៉ាអូខេ កាលពីយប់ថ្ងៃទី ៧ ខែសីហា បច្ចុប្បន្នត្រូវបានមេបញ្ជាការកងរាជអាវុធហត្ថខេត្តសៀមរាប បាន និង កំពុងធ្វើការត្រួតពិនិត្យ ដើម្បីសុំគោលការណ៍ចាត់វិធានការណ៍បន្ត។
គួរឱ្យដឹងផងដែរថា ការត្រួតពិនិត្យបែបនេះ ធ្វើឡើងបន្ទាប់ពីមានការផ្សព្វផ្សាយឱ្យដឹងថា បុរសមួយក្រុម រួមមានមេបញ្ជាការរងកងរាជអាវុធហត្ថខេត្តសៀមរាប ឈ្មោះ ចាន់ ឃុង បានរងការចោទប្រកាន់ពីស្ត្រីរងគ្រោះ ថាបានប្រើហិង្សាទៅលើនាងបណ្ដាលឱ្យរងរបួសផ្ទៃមុខ នៅក្នុងបន្ទប់ខារ៉ាអូខេមួយកន្លែងនៅ បឹងកក់ ខណ្ឌទួលគោក រាជធានីភ្នំពេញ កាលពីយប់រំលងអធ្រាត្រថ្ងៃទី ៧ ឈានចូលថ្ងៃទី ៨ ខែ សីហា ឆ្នាំ ២០២៥៕
