ថ្មីៗកន្លងទៅនេះ លើហ្វេសប៊ុករបស់លោក អ៊ឹម ជីវ៉ា បានបង្ហោះជាបន្តបន្ទាប់ពាក់ព័ន្ធនឹងម្ចាស់កម្មវិធី MGI ណាវ៉ាត់ ដែលបានបង្ហាញអត្តចរិតមិនសមរម្យឡកឡាយដល់រដ្ឋាភិបាលកម្ពុជាម្ដងហើយម្ដងទៀត ព្រមទាំងលោកក៏កំពុងស្វែងរកមុខអ្នកទិញសិទ្ធិកម្មវិធីនេះមកធ្វើនៅកម្ពុជាក្នុងឆ្នាំ ២០២៥ ដែរ។
តាមរយៈការបង្ហោះកន្លងមក លោក អ៊ឹម ជីវ៉ា បានអះអាងថា បើស្គាល់មុខអ្នកទិញសិទ្ធិកម្មវិធី ពីបុគ្គលដែលមើលងាយខ្មែរនេះមកធ្វើទៀតនៅពេលណា លោកនឹងចាត់ការតាមរយៈការប្ដឹងទៅកាន់ប្រសួងវប្បធម៌ និង ក្រសួងពាក់ព័ន្ធ ដោយមិនឱ្យកម្មវិធីមាននៅលើទឹកដីកម្ពុជាដាច់ខាត។
ក្នុងនោះ អ្វីកាន់តែធ្វើឱ្យមហាជនកាន់តែចាប់អារម្មណ៍ជុំវិញរឿងនេះ ខណៈឃើញហ្វេសប៊ុករបស់លោក អ៊ឹម ជីវ៉ា បានបង្ហោះជាថ្មីទៀត បង្ហើបពីអ្នកទិញសិទ្ធិកម្មវិធី MGC នេះកាន់តែច្បាស់ ដែលមានអ្នកស្គាល់បានប្រាប់លោកថា អ្នកបានទិញសិទ្ធិកម្មវិធីនេះ គឺជាម្ចាស់ប្រ៊េនល្បីម្នាក់ ទិញឱ្យតារាល្បីម្នាក់ជាអ្នកកាន់កម្មវិធីនេះទៀតផង។
ការបង្ហោះនោះ លោក អ៊ឹម ជីវ៉ា បានរៀបរាប់ថា ៖ «អុញ បើកភ្នែកឡើង មានគេប្រាប់ថា អ្នកដែលកាន់ Miss grand ថ្មី គឺជាម្ចាស់ប្រ៊េនល្បីម្នាក់ ទិញឱ្យតារាល្បីម្នាក់ជាអ្នកកាន់ តើពិតទេ?? អ្នកណាកាន់មិនសំខាន់ សំខាន់ ពេលនេះខ្ញុំចេញមុខការពាររដ្ឋាភិបាលរបស់ខ្ញុំ ដែលត្រូវបាន អាណាវ៉ាត់ ម្ចាស់ Miss grand International ប្រមាថ មើលងាយ ហើយបើម្ចាស់ប្រ៊េនល្បីនោះនៅតែយកម្មវិធីនេះមកទៀត ស្មើនឹងចូលរួមមើលងាយរដ្ឋាភិបាលខ្មែរដូចពួកសៀមដូចគ្នា។ អ្នកណាក៏ដោយឱ្យតែកាន់ជើងសៀម ទោះគ្នាឯងក៏មិនយោគយល់ឡើយ ហើយខ្ញុំនៅតែបន្តធ្វើការតវ៉ារហូតកម្មវិធីនេះលែងមាននៅលើទឹកដីខ្មែរ»៕
