ក្រោយពីមានការផ្ទុះក្តៅគគុករឿងក្រុមឆបោកអនឡាញ ដែលមហាជនថៃតែងតែរិះគន់មកលើកម្ពុជា ក្នុងនោះតារាថៃលោក Dome Pakorn ក៏បានលូកមាត់ក្នុងរឿងនេះដែរ ដោយលើកឡើងថាមកកម្ពុជាឃើញសុទ្ធតែអគារក្រុមឆបោកអនឡាញ។
តារាប្រុសរូបនេះ បានបោះសម្តីទាំងបំភ្លៃថា ខ្លួនធ្លាប់ទៅធ្វើការនៅភ្នំពេញ និងប៉ោយប៉ែត ហើយពេលទៅដល់ឃើញសុទ្ធតែអគារកន្លែងរបស់ក្រុមឆបោកអនឡាញពេញទាំងអស់ ទៅធ្វើការលើកណាក៏ខ្លាចដែរ មិនហ៊ានសូមសូម្បីប្រើ Wifi នៅសណ្ឋាគារ ព្រោះខ្លាចគេ Hack មិនហ៊ានចេញខាងក្រៅទៀត ព្រោះតែខ្លាចគេចាប់ខ្លួន។ ទាំងនេះបញ្ជាក់ឱ្យឃើញថាទីក្រុងទាំងនេះ គឺដំណើរការទៅដោយលុយចេញពីពួកក្រុមឆបោក ដូចនេះសូមនាយករដ្ឋមន្រ្តី Anutin ចូលរួមបង្រ្កាបក្រុមទាំងនេះឱ្យពេញទី ព្រោះរឿងនេះបង្កការខូចខាតដល់អន្តរជាតិ។
យ៉ាងណាមិញ មានអ្នកលេងបណ្តាញសង្គមនៅកម្ពុជាជាច្រើន បានប្រតិកម្មតបចំពោះសម្តីរបស់តារាប្រុសរូបនេះ ជាពិសេស គឺម្នាក់ៗនាំគ្នាចោទសួរទៅវិញថា បើដឹងថាខ្លាចយ៉ាងនេះហើយ ហេតុអ្វីនៅតែមកកម្ពុជាជាច្រើនដងទៀត ហើយយកអ្វីទៅសម្គាល់ថាអគារខ្ពស់គឺសុទ្ធតែជាអគារក្រុនឆបោកនោះ។ ការនិយាយចោទប្រកាន់គ្មានមូលដ្ឋានច្បាស់លាស់របស់តារារូបនេះ ធ្វើឱ្យប្រជាជនកម្ពុជាទាំងមូលទទួលយកមិនបានដាច់ខាត៕
