កាលពីយប់ថ្ងៃទី ១៥ ខែកក្កដា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេស អ្នកតាមដានបេក្ខភាពឆ្នើម MasterChef Cambodia រដូវកាលទី ៣ អ្នកនាង រស្មី មានការភ្ញាក់ផ្អើលយ៉ាងខ្លាំងលើសំណេរយ៉ាងវែងអន្លាយរបស់អ្នកនាងរៀបរាប់ពីអ្នកប្រកួតរួមជំនាន់។
ក្នុងសំណេរនោះដែរ អ្នកនាង រស្មី បានរៀបរាប់ថា៖ «ខ្ញុំថាអ្នកមានខ្លួនកុំរើស ហ៊ានធ្វើ ហ៊ានទទួលយកការពិតផង។ មានអីឆ្កែរើសយក ហើយព្រុស បើហ៊ានព្រុសត្រូវហ៊ានត្រូវដំបង។ ខ្ញុំជាមនុស្សមិនមើលងាយមនុស្សទេ តែបើថាបានលេងហើយ ជាន់ហែងឱ្យកប់ដី គុំទុកយូរ ហើយមួយម៉ាត់ណាក៏យកចំណេះដឹងមកនិយាយធ្វើកម្សត់ អ្នកណាក៏ធ្លាប់ក្រអ្នកណាក៏ធ្លាប់ពិបាកដែរ ខ្ញុំជួបឆ្អែតហើយ ខ្ជិលនិយាយរៀបរាប់! ឃើញគេក្រពិបាក អាណិតគេណាស់ វេចម្ហូបពីផ្ទះយកទៅឱ្យគេស៊ីទាំងកេះៗ គេអត់លុយឱ្យលុយគេខ្ចី ឃើញគេពិបាក មានអីឯងឱ្យលុយខ្ចីហើយ សងលុយឯងហើយបកមកខាំឯងវិញ។
មួយម៉ាត់ណាក៏ដៀលឯងមនុស្សគ្មានចំណេះដឹង គ្រាន់តែខ្ញុំរៀនបានត្រឹមទី ១២ ជាប់បាក់ឌុប មិនសូវចេះនិយាយអង់គ្លេសដូចគេ តែអញចង់ប្រាប់ថា មនុស្សគ្មានចំណេះដឹង ដែលហែងដៀលរាល់ថ្ងៃជីវិតខ្ញុំជាថៅកែគេ មិនមែនអួតចំណេះដឹងពេញខ្លួនធ្វើខ្ញុំគេប្រាក់ខែ ២៥០$ ទេ។ យី! យាយពីចរិតអន់ជាងឆ្កែទៀត ឆ្កែគេឱ្យបាយវាស៊ី វានៅដឹងគុណស្គាល់គេជួយ តែអាមួយនេះវិញអន់ទាំងចរិត និង មាយាទជាមនុស្សអាត្មានិយមពិត។
អញថាមិនចង់ហែកទេ កុំឱ្យវាអាក្រក់ តែបើជ្រុលអាក្រក់ហើយ អញឱ្យមើលទាំងភស្តុតាងទៀត មិនចង់និយាយច្រើនឱ្យហែងហែកមេឃគេចឱ្យផុត ថាចរិតហែងអាក្រក់កម្រិតណា។ បើខ្ញុំនិយាយពិត សុំឱ្យខ្ញុំកាន់តែមានបានកាន់តែជោគជ័យ អាណានិយាយមិនពិតឱ្យហែងរលាយដូចអំបិលត្រូវទឹកគ្មានថ្ងៃងើបក្បាលរួច។ កុំនិយាយរឿងមានក្រ ចំណេះដឹងព្រោះ មនុស្សល្អអាក្រក់វាបង្ហាញតាមចរិត ទង្វើ មាយាទ និង សណ្ដាន»។
បើទោះជាសំណេរនោះ អ្នកនាង រស្មី មិនបានបញ្ជាក់ថា ជាបុគ្គលណាក្តី ប៉ុន្តែនៅក្នុងឆាតតេឡេក្រាម ដែលឆ្លងឆ្លើយគ្នាការពីពេលកន្លង ដែលអ្នកនាង រស្មី បានបង្ហោះនោះ គឺជាអ្នករួមប្រកួត MasterChef Cambodia រដូវកាលទី ៣ ជាមួយគ្នា៕
