នៅថ្ងៃទី ១៦ ខែឧសភា ឆ្នាំ ២០២៥ នេះ មហាជនអ្នកប្រើប្រាស់បណ្ដាញសង្គម បាន និង កំពុងនាំគ្នាបញ្ចេញមតិរិះគន់ និង សម្ដែងក្ដីមិនពេញចិត្តយ៉ាងខ្លាំង បន្ទាប់ពីបានឃើញវីដេអូកីឡាករគុនខ្មែរ ធឿន ធារ៉ា ជក់បារីអេឡិចត្រូនិចបង្ហុយផ្សែងហុយទ្រលោមក្នុងនាមជាកីឡាករលំដាប់ជួរមុខកម្ពុជា ដែលជាទង្វើមិនល្អ និង ត្រូវគេបានយកមកបង្ហោះបន្តពាសពេញលើបណ្ដាញសង្គមហ្វេសប៊ុក។
វីដេអូដែលកំពុងផ្ទុះការជជែកវែកញែកនេះផងដែរ ត្រូវបានបង្ហោះឡើងដោយគណនីឈ្មោះ មណ្ឌលវប្បធម៌ ដែលមានចំនួនប្រមាណ ១៨ វិនាទី បង្ហាញពីសកម្មភាពកីឡាករគុនខ្មែរ ធឿន ធារ៉ា បឺតបារីអេឡិចត្រូនិចប្រភេទ YooZ បង្ហុយផ្សែងចេញនៅពីមុខកាមេរ៉ា ព្រមទាំងថតជាប់នារីម្នាក់ដែលបានគេងគ្របមុខនៅលើគ្រែផងដែរ ដោយភ្ជាប់ជាមួយសារ ៖ «ក្នុងនាមជាកីឡាករគុនខ្មែរជួរមុខ គួរធ្វើជាជនគំរូ មិនជក់បារី មិនផឹកស្រា ខំប្រឹងហ្វឹកហាត់ អភិវឌ្ឍន៍សម្ថភាពជាប្រចាំ ក្លាយជាកីឡាករកំពូលលើកមុខមាត់ប្រទេសជាតិ និង គ្រួសារបានយូរអង្វែង។ ការជក់ ការផឹក ជាសិទ្ធិបុគ្គល តែវាធ្វើឱ្យប៉ះពាល់ដល់អ្នកគាំទ្រ និង គ្រូបង្វឹកយ៉ាងខ្លាំង។ ត្រូវភ្ញាក់រឭកឡើងវិញ Idol»។
តាមរយៈវីដេអូដ៏ខ្លីនេះ ក៏មានអ្នកបញ្ចេញមតិជាបន្តបន្ទាប់ផងដែរថា ៖ «ជក់ក៏ដោយ ផឹកក៏ដោយ ជាសិទ្ធិរបស់យើងគ្រប់គ្នា តែគួរគិតថាយើងមានមហាជនស្គាល់ច្រើន គួរពេលជក់ ឬ ផឹកលាក់បាំងខ្លះទៅកុំបង្ហាញ ព្រោះក្មេងៗជំនាន់ក្រោយអាចធ្វើតាមលឿនណាស់ ឱ្យតម្លៃខ្លួនឯងផង»។ បន្ថែមលើសពីនេះ មានអ្នកបន្តថា ៖ «ធ្វើជាកីឡាករជូរមុខ ជាមនុស្សរបស់មហាជនគួរណាតែមានជាគំរូដល់អ្នកគាំទ្រ ថ្វីដ្បិតតែវាជាសិទ្ធិរបស់បុគ្គលក៏ពិតមែន តែយើងជាកីឡាករល្អមួយរូប មិនគួណាមកធ្វើនូវទង្វើដែលគ្មានប្រយោជន៍អ្វីនៅក្នុងសង្គមអ៊ីចឹងនោះទេ! ឆាប់មានស្មារតីភ្ញាក់រឭកឡើងវិញផងណា IDOL»៕
