ថ្មីៗនេះ ប្រទេសជប៉ុនបានសម្តែងការបារម្ភ និងការមិនពេញចិត្តជាខ្លាំងចំពោះប្រទេសវៀតណាម ដែលបានហាមប្រជាជនលែងឱ្យប្រើប្រាស់ម៉ូតូប្រើសាំងនៅក្នុងទីក្រុងហាណូយ ហើយត្រឡប់មកប្រើម៉ូតូអគ្គិសនីវិញ។
តាមព័ត៌មានបានឱ្យដឹងថា ប្រទេសវៀតណាមបានដាក់ច្បាប់ហាម មិនឱ្យប្រជាជនខ្លួនប្រើម៉ូតូប្រើសាំងនៅទីក្រុងហាណូយ តាំងពីពាក់កណ្តាលឆ្នាំ ២០២៥ នេះមកម្ល៉េះ ហើយឱ្យត្រឡប់ទៅប្រើម៉ូតូអគ្គិសនីវិញ ដោយមានបំណងជួយកាត់បន្ថយផ្សែងពុលនៅក្នុងអាកាស និងជួយលើកកម្ពស់ការប្រើម៉ូតូអគ្គិសនី។ ជាមួយគ្នានេះ ប្រទេសជប៉ុនបានសម្តែងការបារម្ភ និងមិនពេញចិត្តយ៉ាងផ្លូវការតាមរយៈស្ថានទូត ដោយស្នើសុំឱ្យវៀតណាម ពិនិត្យគោលនយោបាយខាងលើនេះឡើងវិញ។
ជប៉ុន បានលើកឡើងថា វាអាចមានផលប៉ះពាល់ដែលកើតមានឡើងដូចជា មនុស្សជាច្រើននៅក្នុងឧស្សាហកម្មដែលពាក់ព័ន្ធអាចបាត់បង់ការងារ ជាពិសេសគឺក្រុមហ៊ុនផលិតគ្រឿងបន្លាស់ ប៉ះពាល់ដល់ទីផ្សារម៉ូតូក្នុងប្រទេសវៀតណាម អ្វីដែលសំខាន់បំផុត គឺប៉ះពាល់ផ្ទាល់ដល់ក្រុមហ៊ុន Honda ដែលជាអ្នកកាន់កាប់ចំណែកភាគហ៊ុនច្រើនជាងគេនៅក្នុងទីផ្សារនេះ៕
