កាលពីថ្ងៃទី ២០ ខែមេសា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេសអ្នកសិល្បៈជាច្រើន បានបង្ហាញក្តីរន្ធត់ចិត្ត ក្រោយទទួលដំណឹងមរណភាពរបស់អ្នករាំមួយរូប ព្រោះវិបត្តិផ្លូវចិត្ត។
អ្នករាំមានប្រជាប្រិយភាព ដែលជាសមាជិកក្រុមរាំរបស់តារាចម្រៀងល្បីៗជាច្រើន ត្រូវបានគេស្គាល់ឈ្មោះក្នុងសិល្បៈថា តុងតុង។ ក្នុងនោះ តាមការឱ្យដឹងពីអ្នកស្និទ្ធស្នាលបានប្រាប់ថា តុងតុង មានវិបត្តិផ្លូវចិត្តជាយូរមកហើយ ហើយកាលពីរសៀលថ្ងៃទី ១៩ ខែមេសា ឆ្នាំ ២០២៥ លោកក៏បានសម្រេចចិត្តធ្វើអត្តឃាត ដោយចង-កសម្លាប់ខ្លួន។ បច្ចុប្បន្ន សពបានដឹកទៅធ្វើបុណ្យតាមប្រពៃណីនៅឯស្រុកកំណើតនាខេត្តស្ទឹងត្រែង។
យ៉ាងណាមិញ អ្វីដែលកាន់តែធ្វើឱ្យមហាជនស្លុតចិត្ត ជាពិសេស មិត្តភក្តិកាន់តែមានការសោកស្តាយនោះ ខណៈកំពុងមានបញ្ហាផ្លូវចិត្តនេះដែរ តុងតុង ក៏ត្រូវបានមិត្តភក្តិយកចិត្តទុកដាក់ និង ផ្តល់កម្លាំងចិត្តដល់លោកដូចគ្នាដែរ តែកម្លាំងនៃវិបត្តិផ្លូវចិត្ត នៅតែឆក់យកជីវិតលោកបាន។
ម្យ៉ាងវិញទៀត អ្វីកាន់តែក្តុកក្តួលនោះ តាមរយៈការបង្ហោះពីមិត្តភក្តិស្និទ្ធស្នាលរាប់អានគ្នាដូចបងប្អូន ដែលមានគណនីឈ្មោះ Mrr Hav បានឱ្យដឹងថា លោកទើបតែទិញអាហារឱ្យ តុងតុង នៅម៉ោង ២ រសៀល ហើយត្រឡប់មកម្តងទៀតនៅពេលល្ងាច បែរជាជួបរឿងរន្ធត់ចិត្ត ដោយ តុងតុង បានចង-កបញ្ចប់ជីវិតបាត់ទៅហើយ។
ក្នុងនោះ Mrr Hav បានរៀបរាប់ថា៖ «លឿនពេកហើយកូនអើយ Sok Heng អើ ម៉ែទទួលយកសឹងតែមិនបានទេ ម៉ោង ២:00 រសៀល ម៉ែទើបទិញបបរ និង ទឹកដូង និង ទឹកសុទ្ធ ឱ្យកូនញុំា ល្ងាចឡើងម៉ែទៅមើលកូនម្ដងទៀត កូនដាច់ចិត្តទៅចោលម៉ែចឹង? សូមឱ្យវិញ្ញាណក្ខន្ធកូន ទៅឱ្យបានសុខណា! បើមានជាតិក្រោយ សូមកុំឱ្យកូនជួបរឿងបែបនេះទៀត RIP»៕
