គិតត្រឹមម៉ោង ១១ ព្រឹកថ្ងៃទី ១ ខែសីហា ឆ្នាំ ២០២៥ នេះ ទាហានកម្ពុជាចំនួន ២ រូប ត្រូវបានភាគីថៃប្រគល់ត្រឡប់មកវិញហើយ នៅច្រកទ្វារព្រំដែនអន្ដរជាតិអូរស្មាច់ ខេត្តឧត្តរមានជ័យ និង ត្រូវបានកងកម្លាំងជំនាញ និង គ្រូពេទ្យ បញ្ជូនទៅសង្គ្រោះបន្ទាន់ភ្លាមៗផងដែរ។
ក្នុងកំឡុងពេលបញ្ជូននៅតាមផ្លូវទៅកាន់មន្ទីរពេទ្យក្នុងភូមិសាស្ត្រអូរស្មាច់ ក៏មានយុវជនកម្ពុជាប្រកបដោយស្មារតីដឹងគុណមួយរូប បានសម្ដែងការគោរពប្រកបដោយភាពស្មោះស្ម័គ្រ ដោយបានលត់ជង្គង់សំពះរថយន្តសង្គ្រោះដែលដឹកវីរកងទ័ពខ្មែរ ដែលបានបើកកាត់តាមផ្លូវ តាមរយៈកាយវិការលត់ជង្គង់ចុះដោយក្ដីគោរព លើកដៃសំពះទាំងទឹកភ្នែក និង ឱនក្រាបដល់ដីសម្ដែងការដឹងគុណ គួរឱ្យរំជួលចិត្តជាទីបំផុត។ យុវជនដែលបានសម្ដែងការដឹងគុណនេះ ត្រូវបានគេស្គាល់ថាជាម្ចាស់គណនីដែលមានឈ្មោះ រស់ ព្រួយ បានបង្ហោះវីដេអូ នៅថ្ងៃទី ០១ ខែសីហា ឆ្នាំ ២០២៥ នេះ រយៈពេលប្រមាណជិត ១០ វិនាទី។
សូមបញ្ជាក់ផងដែរថា វីរកងទ័ពកម្ពុជាដែលត្រូវបានភាគីថៃបញ្ជូនមកកម្ពុជា ទាំង ២ នាក់ ត្រូវបានគេស្គាល់ថាជា អនុសេនីយ៍ត្រី អាង អឿង អាយុ ៣៧ ឆ្នាំ និង ពលបាលឯក ម៉ម វុទ្ធី អាយុ ៥៣ ឆ្នាំ ខណៈវីរកងទ័ពទាំង ២ នាក់ ត្រូវបានបញ្ជូនត្រឡប់មកវិញយ៉ាងខុសប្រក្រតីដោយមានម្នាក់ពិការ និង ម្នាក់ទៀតបានភ្លេចភ្លាំងស្មារតី និង ត្រូវបានកងកម្លាំងជំនាញ និង គ្រូពេទ្យបញ្ជូនទៅសង្គ្រោះបន្ទាន់ភ្លាមៗផងដែរ៕ សូមចុចទីនេះដើម្បីទស្សនាវីដេអូ
