មហាជន ជាពិសេសអ្នកតាមដានខ្សែភាពយន្ដ និង ចម្រៀងកាយវិការ ពិតជាបានស្គាល់ច្បាស់មកហើយពីតារាសម្តែងប្រុស លោក ប៊ុន លីម៉ា ដែលដុះពន្លកចេញពីការប្រកួត Freshy Boy កាលពីឆ្នាំ ២០០៨។ ក្នុងនោះ ក្រោយពីបោះជំហានលើវិថីសិល្បៈមកដល់ពេលនេះ គឺមានរយៈពេលប្រមាណជាង ១២ ឆ្នាំហើយ ដែលលោកបាន និង កំពុងបន្តដំណើរក្នុងអាជីពជាតារាសម្តែង និង ទទួលបានប្រជាប្រិយភាព។
ងាកទៅកាន់ជីវិតឯកជនឯណោះវិញ ថ្មីៗនេះ អ្នកលេងបណ្តាញសង្គមហ្វេសប៊ុក មានការចាប់អារម្មណ៍យ៉ាងខ្លាំង បន្ទាប់ពីបានឃើញគណនីហ្វេសប៊ុកមួយឈ្មោះថា San Tepy អះអាងជាភរិយារបស់លោក ប៊ុន លីម៉ា និង បានបង្ហោះរូបភាពលក្ខណៈគ្រួសារ ព្រមទាំងកូនៗ ២ នាក់ មើលទៅគឺជាគ្រួសារមួយពេញដោយភាពកក់ក្ដៅ។
ក្នុងនោះដែរ បើតាមការបង្ហោះពីភរិយារបស់លោក ប៊ុន លីម៉ា បានឱ្យដឹងថា អ្នកទាំង ២ ទទួលបានចំណងដៃកូនប្រុសស្រីចំនួន ២ នាក់ហើយ ក្នុងចំណងប្រាំប្រការរយៈពេលប្រមាណជាង ១៤ ឆ្នាំ មកនេះ។ ងាកទៅមើលសម្រស់ប្រពន្ធ និង កូនៗ របស់លោក ប៊ុន លីម៉ា ឃើញថាមានសម្រស់ស្រស់ស្អាតគួរឱ្យស្រឡាញ់ខ្លាំង ដូចពាក្យចាស់ថា ប៉ាម៉ាក់ស្អាត កូនមកក៏ស្អាតៗកាត់តាមគ្នា។
បើក្រឡែកទៅមើលសារអមនឹងរូបភាពនោះដែរ ភរិយាលោក ប៊ុន លីម៉ា បានរៀបរាប់ថា ៖ «ទុកឱ្យកូនមើលកុំឱ្យភ្លេចមុខប៉ាៗ ប៊ុន លីម៉ា រូបភាពអនុស្សាវរីយ ១៥ ឆ្នាំមានតែប៉ុណ្ណឹង»។ យ៉ាងណាមិញ តាមរយៈការបង្ហោះនេះដែរ បានធ្វើឱ្យអ្នកគាំទ្រមានការភ្ញាក់ផ្អើល ជាមួយនឹងការជូនពរលោក ប៊ុន លីម៉ា និង គ្រួសារតូចនេះកាន់តែមានសុភមង្គល៕
