ស្ថិតនៅចម្ងាយប្រមាណ ២៩០ គីឡូម៉ែត្រពីរាជធានីភ្នំពេញ ខេត្តកោះកុង ត្រូវបានគេស្គាល់ថាជាទឹកដីដែលសម្បូរទៅដោយភ្នំតូចធំ មានឆ្នេរសមុទ្រ និង កោះច្រើនរដឹក ជាកន្លែងទេសចរណ៍ដ៏ពេញនិយម សម្រាប់សម្រាកលម្ហែកម្សាន្តបានទាំងក្នុងរដូវក្ដៅ និង ក្នុងរដូវវស្សាជាដើម។
ជាក់ស្ដែងថ្មីៗនេះ មហាជនអ្នកប្រើប្រាស់បណ្ដាញសង្គម កំពុងតែលង់នឹងសម្រស់ដ៏ស្រស់ត្រកាលនៃតំបន់ទឹកធ្លាក់មួយកន្លែង ស្ថិតក្នុងភូមិសាស្ត្រទឹកដីដ៏អំណោយផលមួយនេះ ដែលបច្ចុប្បន្នកំពុងតែឈរបង្អួតសម្រសយ៉ាងស្រស់ត្រកាល មានឈ្មោះយ៉ាងទាក់ទាញថា «ទឹកធ្លាក់វាលខ្សាច់»។
ស្ថិតនៅក្នុងភូមិសាស្ត្រស្រុកថ្មបាំង ខេត្តកោះកុង «ទឹកធ្លាក់វាលខ្សាច់» ឬហៅម្យ៉ាងទៀតថា ទឹកធ្លាក់ជញ្ជាំដាច់ ដ្បិតថាពុំសូវមានអ្នកស្គាល់ពីមុនមែន តែក្នុងរដូវវស្សាឈានចូលមកដល់នេះ ទេសភាព និង ឈ្មោះទឹកធ្លាក់វាលខ្សាច់ បាន និង កំពុង ទាក់ចិត្តទាក់អាអារម្មណ៍ភ្ញៀវទេសចរបន្តិចម្ដងៗ ដោយសារតែបច្ចុប្បន្ននេះ ទីតាំងទឹកធ្លាក់មួយនេះ មានទឹកធ្លាក់យ៉ាងខ្ពស់ ធ្លាក់ស្រោចស្រពមកលើប្រព័ន្ធទឹក ហូរកាត់ជើងភ្នំ គួរជាទីមនោរម្យត្រជាក់ចិត្តត្រជាក់កាយក្រៃលែង។
មិនត្រឹមតែប៉ុណ្ណោះ ក្នុងរដូវនេះ នៅចំណុចទីតាំងមាត់ទឹកមានកម្រាលស្មៅពណ៌បៃតងខ្ចីលាតសន្ធឹងល្វឹងល្វើយដាច់កន្ទុយភ្នែក និង មានមែកឈើឈរអមមាត់ទឹកច្រើនស្កេកស្កះ បង្កើតបានទៅជាទស្សនីយ៍ភាពដ៏ប្លែកភ្នែកមួយ កម្របានឃើញពីមុនមក ដែលលក្ខណៈពិសេសទាំងអស់នេះ ពិតជាស័ក្តិសមបំផុតសម្រាប់ប្រិយមិត្តដែលនិយមធ្វើដំណើរបោះតង់ផ្សងព្រេង ស្រូបយកខ្យល់ធម្មជាតិ គេងស្ដាប់ទឹកហូរ និង និយាយរឿងក្នុងចិត្តជាមួយមិត្តភក្តិ មនុស្សជាទីស្រឡាញ់ និង ក្រុមគ្រួសារជាដើម៕
ប្រភពរូបភាព ៖ Sren Lee
