បច្ចុប្បន្ន លំហាត់ប្រាណ Pilates កំពុងទទួលបានការពេញនិយមខ្លាំងនៅកម្ពុជា ដោយហេតុវាមានលក្ខណៈប្លែក ផ្តល់ប្រយោជន៍ច្រើន ធ្វើឱ្យរាងស្អាត ឥរិយាបថល្អ បង្កើតចលនាបត់បែនរាងកាយ កាត់បន្ថយស្ត្រេស បង្កើនការចងចាំ និង ឈ្លាសវៃ។ មួយក្នុងចំណោមកន្លែងហាត់ប្រាណប្រភេទនេះ Align គឺជាស្ទូឌីយោហាត់ប្រាណ Pilates ដែលកំពុងលេចធ្លោ និង ទទួលបានប្រជាប្រិយភាពខ្លាំង។
តាមរយៈការចុះផ្សាយរបស់ទស្សនាវដ្តីអន្តរជាតិ Prestige ស្ទូឌីយោ Align ដែលបង្ហាត់ Pilates ត្រូវបានបង្កើតឡើងដោយស្ថាបនិកវ័យក្មេងគឺ កញ្ញា Borasy Lim។ ជាមួយនឹងសញ្ញាបត្រអនុបណ្ឌិតផ្នែកគ្រប់គ្រងពីសាលាធុរកិច្ច IE Business School ស្ថាបនិករូបនេះ បានបើកដំណើរការស្ទូឌីយោ Pilates ឯករាជ្យដំបូងគេនៅកម្ពុជា ភ្ជាប់នឹងយុទ្ធសាស្ត្រដ៏មុតស្រួច និង ទស្សនវិស័យជាសកល។
ក្នុងវ័យ ២៤ ឆ្នាំ ស្ថាបនិកា Borasy Lim បានពង្រីកស្ទូឌីយោដល់ទៅ ២ កន្លែង មួយនៅក្នុងតំបន់ទួលទំពូង និង មួយទៀតនៅតំបន់បឹងស្នោ រាជធានីភ្នំពេញ។ ស្ទូឌីយោនេះ ទទួលបានការគាំទ្រក្នុងរយៈពេលដ៏ខ្លី ជាពិសេស ពីសំណាក់អ្នកស្រលាញ់រាងស្អាត ត្រូវចិត្តបំផុតសម្រាប់មនុស្សសម័យថ្មី។ នៅជំហានបន្ទាប់ នាងនឹងមានគម្រោងផ្សេងៗដូចជា ការសហការ, ការ pop-ups និង នាំយកនូវបទពិសោធថ្មីៗបន្ថែមផងដែរ៕
