កំពុងល្បីរឿង មានអ្នកលក់ទុរេនមេមត់អនឡាញ ស្រាប់តែអ្នកមេមត់ចេញមកបញ្ចេញមតិចំៗថា ទុរេនខែ ៦ ទើបមានទុំ ឆ្នាំខ្លះចូលដល់ខែ ៧ ក៏មាន

មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការជជែកវែកញែកបន្តគ្នាព្រោងព្រាត ក្រោយមានអ្នកលក់ទុរេនបង្ហោះតាមអនឡាញលក់ក្នុងតម្លៃ ១ គីឡូ ១៣០០០ រៀល ដោយអះអាងថាជាទុរេនមេមត់ ទាំងដែលម្ចាស់ចម្ការទុរេននៅមេមត់ជាច្រើន បានចេញមុខអះអាងថា ទុរេនដែលស្ថិតនៅក្នុងចម្ការ ក្នុងភូមិសាស្ត្រស្រុកមេមត់ គឺនៅក្ដឹបនៅឡើយពុំទាន់អាចលក់បាននោះឡើយ។

ជុំវិញការជជែកវែកញែកនេះផងដែរ ក៏មានម្ចាស់គណនីហ្វេសប៊ុកមួយឈ្មោះ Champey Viet បានបញ្ចេញមតិទៅលើរឿងនេះយ៉ាងសមហេតុសមផល នៅថ្ងៃទី ២១ ខែមីនា ឆ្នាំ ២០២៥ ថា ៖ «ចែគាត់ខឹងអ្នកស្រុកខ្ញុំអស់ ១ ស្រុកហ្មង ថាអ្នកស្រុកខ្ញុំជាន់គាត់ ត្រង់គាត់ធ្វើខូចយីហោកសិផលស្រុកគេហ្នឹង ម៉េចវិញ? ម្រេចក៏ដោយ ទុរេនក៏ដោយ ផលិតផលស្រុកខ្ញុំប្រហាក់ប្រហែលនឹងខេត្តកំពតដែរ ទាំងរសជាតិ និង គុណភាព តែអ្នកលក់ឈ្មួញកណ្តាលធ្វើឱ្យខូចម៉ាកសញ្ញាអស់ ដោយយកកសិផលពីប្រទេសជិតខាងមកបន្លំលក់បោកគេ ធ្វើឱ្យកសិករពិបាករកទីផ្សារលក់ចេញ ព្រោះគេអត់ទុកចិត្ត»។

តាមប្រភពបានបន្តបកស្រាយពីពេលវេលាដែលផ្លែទុរេនខ្មែរទុំទៀតថា ៖ «ខែទុរេនដូនតា ឬ ហៅទុរេនបុរាណ (គ្រាប់ធំសាច់ស្តើង) ចុងខែ ៥ ដល់ដើមខែ ៦។ ពាក់កណ្តាលខែ ៦ ដល់ពាក់កណ្តាលខែ ៧ ពូជរី ៦ (ផ្លែស្អាតៗមូលៗធំ បន្លាធំសាច់លឿង សាច់អត់សូវល្មួតទេ ហូបអត់ងាយឆ្អែត តែរសជាតិចាញ់ម៉នថង១ពិន្ទុ) ទម្ងន់ផ្លែចន្លោះពី ១,៥kg ទៅ ៧kg ក្នុង ១ ផ្លែ។ ចុងខែ ៦ រហូតដល់ខែ ៨ ទើបដល់ម៉នថង ផ្លែមិនសូវស្អាតស្មើទេ កំពៀតកំប៉ោងផ្លែមិនមូលគ្រប់ជ្រុងទេ បន្លាតូច អាចសម្បកខៀវខ្ចី ឬប្រផេះ សាច់ល្មួតខ្លាំងពណ៌ទឹកដោះគោ ហូបឆាប់ឆ្អែត ទម្ងន់ផ្លែចន្លោះពី ១ ទៅ ៤ kg ក្នុង ១ ផ្លែ។

នៅមានមុសានឃីង និង ឳខាក់ ឬពូជផ្សេងទៀត ក៏ទុំចន្លោះខែ ៦ ទៅខែ ៨ ដែរ។ តាមអាកាសធាតុក្នុងឆ្នាំនីមួយៗ ឆ្នាំខ្លះដល់នៅខែ ៦ ឆ្នាំខ្លះរាំងហួតហែងពេក អាចខែ ៧ ឬខែ ៨។ ជាទូទៅទុរេន រាប់ពីថ្ងៃរីកផ្ការហូត ដល់ទុំចំណាយពេល ៤ ខែ តែកសិករខ្លះគាត់កាត់លក់មុនកន្លះខែ ឬ ១ អាទិត្យ ជៀងវាងទុំជ្រុះនៅនឹងដើម»៕