នៅក្នុងសម័យកាលបច្ចេកវិទ្យាឌីជីថលកាន់តែទំនើបជឿនលឿន បណ្ដាញសង្គមមួយចំនួនបានក្លាយជាវិធីសាស្ត្រក្នុងការចែករំលែកចំណេះដឹង និង ជំនាញផ្សេងៗ ពិសេសនោះគឺបណ្ដាញសង្គម Tiktok ដែលមានអ្នកផលិតមាតិកាចែករំលែកគំនិតល្អៗ ហើយលោកគ្រូ អ្នកគ្រូ ក៏អាចចែករំលែកមេរៀនបានយ៉ាងទូលំទូលាយទៅកាន់សិស្សានុសិស្សផងដែរ។
ជាក់ស្ដែងថ្មីៗនេះ គ្រូបង្រៀនបុរសវ័យក្មេងមានរូបរាងសង្ហាមួយរូប មានទឹកដមសំឡេងគួរឱ្យទាក់ទាញ កំពុងត្រូវបានអ្នកប្រើប្រាស់បណ្ដាញសង្គម TikTok នាំគ្នាផ្ទុះការចាប់អារម្មណ៍ និង ស្ងើចសរសើរព្រោងព្រាត ដោយសារតែលោកគ្រូតែងបង្ហោះវីដេអូដោះស្រាយលំហាត់គណិតវិទ្យាថ្នាក់ទី ១២ ជាប្រចាំតាមរយៈគណនី Tiktok ឈ្មោះ rithida_math ថាក់ រិទ្ធិដា គណិតវិទ្យា និង មានបង្រៀនគណិតវិទ្យាតាមអនឡាញផងដែរ សម្រាប់ថ្នាក់ត្រៀមប្រឡងបាក់ឌុប។
តាមរយៈការដោះស្រាយលំហាត់គណិតវិទ្យាច្បាស់ៗ មានវគ្គមានឃ្លា បូករួមជាមួយទឹកដមសំឡេងធ្ងន់ច្បាស់ៗ បានធ្វើឱ្យវីដេអូនៅលើបណ្ដាញសង្គមរបស់គ្រូបង្រៀនវ័យក្មេងរូបនេះ មានអ្នកទស្សនាច្រើនរាប់រយពាន់ទស្សនា និង មានអ្នកតាមដាននៅលើបណ្ដាញសង្គមរបស់លោកជិត ១ ម៉ឺននាក់ផងដែរ។ ក្នុងនោះក៏មានការខមមិនចង់ឱ្យលោកគ្រូទៅបង្រៀនដល់ផ្ទះទៀតផង៕
