កំពុងផ្ទុះតាមគ្នា! ល្បីថ្ងាសង៉ូវហេង នារីខ្លះសម្រុកឱ្យជាងកោរជើងសក់លើថ្ងាសបាញ់ឡាស៊ែរយកទម្រង់ង៉ូវហេង ជឿថានឹងក្លាយជាជំទាវសេដ្ឋិនី

មួយរយៈក្រោយនេះ មានការផ្ទុះខ្លាំងទាក់ទងនឹងង៉ូវហេងថ្ងាស ដែលនារីៗមួយចំនួនបានទៅកោរសក់យកទម្រង់ថ្ងាសង៉ូវហេង ថ្ងាសហុងស៊ុយ ឬ ថ្ងាសលេខ ៩ ដោយជឿថា ថ្ងៃមុខនឹងក្លាយជាជំទាវ ឬ សេដ្ឋិនី។​

ការពេញនិយមកោរថ្ងាសនេះ ឃើញមានការផ្សាព្វផ្សាយលើបណ្តាញសង្គមជាច្រើន ជាពិសេសពីហាងសាឡនតូចធំ សូម្បីកន្លែងខ្លះមានកោរសក់ថ្ងាសហើយ ប្រើឧបករណ៍ទំនើប ដូចជាឡាស៊ែរជាដើម ដើម្បីបាញ់បំបាត់កុំឱ្យសក់ដុះមកវិញទៀតផង។

ទន្ទឹមនឹងការផ្សព្វផ្សាយបានផ្ទុះការចាប់អារម្មណ៍ ក៏ឃើញមានមហាជនមួយចំនួនបានចេញមុខប្រតិកម្មផងដែរ ដោយពួកគេបានលើកឡើងក្នុងន័យក្រើនរម្លឹកថា ការកោរសក់យកង៉ូវហេងថ្ងាសនេះ មិនមែនចេះតែធ្វើឱ្យតែបាន ឬ តាមតែមាត់និយាយតៗគ្នានោះទេ ពោលគឺតម្រូវចេញពីអ្នករៀនក្បួនត្រឹមត្រូវ។

ជាក់ស្តែង ម្ចាស់គណនី TikTok មួយឈ្មោះថា Yuri Make Up689 បានចេញវីដេអូនិយាយពីការកោរសក់ថ្ងាសនេះ មិនមែនអាចក្លាយជាជំទាវ ឬ សេដ្ឋិនីនោះទេ ង៉ូវហេងពិតប្រាកដគឺកើតបានដោយសារការខិតខំប្រឹងប្រែង ការធ្វើការច្បាស់លាស់ ទើបបានង៉ូវហេងពិតប្រាកដ។ មួយវិញទៀត កុំសូវជឿតាមការឃោសនាពេក ព្រោះសូម្បីតែជាងមួយចំនួន និង អ៊ីលក់ត្រីឥលូវក៏ចេះង៉ូវហេងដែរ។ បើកោរបានង៉ូវហេងមែន ម្ល៉ោះ! ជាងមួយចំនួនក្លាយជាសេដ្ឋីមុនបាត់ទៅហើយ។ ម្ចាស់គណនី TikTok រូបនេះក៏ សំណូមពរឱ្យពិចារណាឱ្យបានច្បាស់ ដោយកុំចង់មានលឿនពេក ជឿតាមពាក្យគេនិយាយ។

ដោយឡែក គណនី TikTok មួយទៀត ឈ្មោះ Meimei-chhhy ដែលអះអាងថាជាសិស្សធ្លាប់បានរៀនង៉ូវហេង នាងក៏បានមានសារខ្លីៗក្នុងនាមជាសិស្សរៀនង៉ូវហេងពីសាលាត្រឹមត្រូវផងដែរ។ នាងថា មិនមានទេថ្ងាសជំទាវ ចិញ្ចើមជំទាវ មានតែទម្រង់ចិញ្ចើមមេម៉ាយ ថ្ងាសមេម៉ាយ និង ទម្រង់មុខមេម៉ាយ។ ជាធម្មតាការធ្វើអ្វីក៏ដោយ គេមានក្បួនខ្នាតត្រឹមត្រូវ។ ង៉ូវហេង ត្រូវមើលតាំងពីមុខមាត់ ត្រចៀក និង អាយុ ជាដើម ហើយក៏តម្រូវកែមានក្បួនតម្រាត្រឹមត្រូវ។ មិនមែនចេះតែកែៗខុសក្បួនខ្នាត ប៉ះពាល់សាមីខ្លួន ដែលអត់ដឹងអីទៅវិញ។

ចុះសម្រាប់ប្រិយមិត្តវិញ យល់យ៉ាងណាចំពោះការកោរសក់លើថ្ងាសយកង៉ូវហេងនេះ?៕