ស្ថិតក្នុងរដូវវស្សា ប្រាសាទអង្គរវត្ត ដែលជាកេរ្តិ៍មរតករបស់បុព្វបុរសដូនតាខ្មែរ នៅឈរយ៉ាងរឹងមាំអង់អាចចាំទទួលភ្ញៀវទេសចរជាតិ និង អន្តរជាតិ ចូលទស្សនា សិក្សាស្រាវជ្រាវពីស្ថាបត្យកម្មដ៏អច្ឆរិយមួយនេះ ដ្បិតថាទេសភាពក្នុងរដូវកាលនេះ ប្រកបទៅដោយទិដ្ឋភាពស្រស់ត្រកាល មានកម្រាលស្មៅពណ៌បៃតងអមជុំវិញមាត់ទឹក និង ផ្ទៃប្រាសាទ បូករួមនឹងដើមឈើធំៗត្រឈឹងត្រឈៃពេញក្នុងតំបន់អង្គរទៀតនោះ ធ្វើឱ្យភ្ញៀវទេសចរមិនចង់ឃ្លាតចាកពីដែនដីដ៏ពិសិដ្ឋមួយនេះឡើយ។
អ្វីដែលកាន់តែធ្វើឱ្យភ្ញៀវជាតិ និង អន្តរជាតិកាន់តែចាប់អារម្មណ៍ទៀតនោះ គឺថ្មីៗនេះរូបភាពជាច្រើនសន្លឹកដែលថតបានពីភ្ញៀវទេសចរ ក៏ដូចជាខាងមគ្គុទេសទេសចរណ៍ បានបង្ហាញពីប្លង់រូបភាពកំពុងពេញនិយម និង កំពុងផ្ទុះការចាប់អារម្មណ៍មួយ នោះគឺប្លង់ថតដែលស្ថិតនៅក្នុងប្រាសាទអង្គរវត្ត (ទិសខាងជើង) ជាប្លង់ទិដ្ឋភាពដែលប្រៀបបាននឹងផ្ទាំងគំនូរ ដែលគ្រប់គ្នាមិនគួររំលងពេលបានទៅលេងស្ថាបត្យកម្មអច្ឆរិយអង្គរវត្ត ទឹកដីខេត្តសៀមរាប។
ដើម្បីឱ្យកាន់តែងាយស្រួល លោកអ្នកអាចផ្លាស់ប្ដូរអារម្មណ៍ទស្សនាតាមរយៈការចូលទៅកាន់ប្រាសាទអង្គរវត្តពីក្លោងទ្វាខាងកើត ដែលជាក្លោងទ្វាខាងក្រោយវិញម្ដង ដែលមុននឹងចូលគឺមានចំណតផ្ញើរយានយន្តឥតគិតថ្លៃពីខាងអាជ្ញាធរអប្សរា រួចដើរសំដៅឆ្លងកាត់ស្ពានឈើមួយដើម្បីឆ្ពោះទៅកាន់ក្លោងទ្វាខាងក្រោយប្រាសាទ រួចអាចសំដៅទៅកាន់ទិសខាងជើងនៃប្រាសាទ ដើម្បីផ្ដិតយករូបភាពដែលកំពុងផ្ទុះការចាប់អារម្មណ៍ និង កំពុងពេញនិយមនេះផងដែរ៕
