ក្រោយធ្វើកម្មវិធីប្រកាសថ្ងៃរៀបការយ៉ាងរំភើបកាលពីប៉ុន្មានខែកន្លងទៅ មកដល់ពេលនេះ នៅសល់តែជាង ១ ខែទៀតទេ តារាចម្រៀងប្រុសស្រី លោក ជី ដេវីត និង អ្នកនាង ទេព បូព្រឹក្ស បានក្លាយជាកូនកំលោះកូនក្រមុំក្នុងរោងជ័យតាមប្រពៃណីហើយ ដោយអ្នកទាំងពីរបានត្រៀមរៀបចំថ្ងៃពិសេសយ៉ាងធំដុំអធិកអធមសមនឹងកិត្តិយសមុខមាត់របស់គ្រួសារទាំងសងខាងនៅខែ មិថុនា ខាងមុខ។
ស្របពេលកំពុងត្រៀមខ្លួនសម្រាប់ថ្ងៃសិរីមង្គលខាងមុខនេះ ងាកទៅមើលអនាគតកូនកំលោះកូនក្រមុំក្នុងរោងជ័យទាំងពីររូប បានដឹកដៃគ្នាថតរូប Pre-Wedding ក្នុងឈុតសម្លៀកបំពាក់ប្រពៃណីខ្មែរដ៏ស្អាតៗប្រណីតគ្រប់ទម្រង់ជាបន្តបន្ទាប់ ទាំងក្នុង និង ក្រៅប្រទេស។
ជាក់ស្ដែង ក្រោយបង្ហាញវីដេអូ ក៏ដូចជារូបភាពថត Pre-Wedding បែបប្រពៃណីខ្មែរស្អាតៗជាច្រើនទម្រង់ ថ្មីៗនេះ អ្វីកាន់តែប្លែកអារម្មណ៍ទៀត ខណៈបានឃើញតារាប្រុសស្រីមួយគូនេះ បានតុបតែងមុខ ធ្វើសក់ គ្រងឈុត «ព្រះថោងនាងនាគ» ថតរូបបែប Concept ជំនាន់មុន លេងទឹកមុខសមខ្លាំង កំពុងធ្វើឱ្យមហាជនផ្ទុះចាប់អារម្មណ៍ចែករំលែកបញ្ចញមតិសរសើរ និង អស់សំណើចផងដែរ៕
