កាលពីថ្ងៃទី ១២ ខែមីនា ឆ្នាំ ២០២៥ កន្លងទៅនេះ មានករណីមួយនៅប្រទេសថៃ ដែលបុរសម្នាក់ទាញកាំភ្លើងផ្តាច់ជីវិតអ្នកជិតខាង ដោយសារតែគំនុំជាង ៤ ឆ្នាំរឿងបើកចម្រៀងតម្លង់រកសម្រាកមិនបាន។
តាមព័ត៌មានបានឱ្យដឹងថា ករណីមួយនេះបានកើតឡើងនៅស្រុក Khun Han ខេត្ត Sisaket ដោយជនបង្កហេតុមានវ័យ ៤៨ ឆ្នាំ រីឯជនរងគ្រោះមានវ័យ ៤៦ ឆ្នាំ។ ក្នុងនោះនៅថ្ងៃកើតហេតុ ខាងជនបង្កបានត្រឡប់មកពីចៀរជ័រវិញ ហើយមានការហត់នឿយចង់សម្រាក តែខាងជនរងគ្រោះបានចាក់ចម្រៀងឮខ្លាំងៗ ជនបង្កក៏បានដើរទៅប្រាប់ឱ្យបន្ថយសំឡេង តែជនរងគ្រោះមិនស្តាប់ ទើបកើតការឈ្លោះទាស់ទែងគ្នា រហូតជនបង្កទៅទាញកាំភ្លើងមកបាញ់រងគ្រោះតែម្តង។
យ៉ាងណាមិញ ជនរងគ្រោះត្រូវបានគេបញ្ជូនទៅមន្ទីរពេទ្យ ដើម្បីសង្រ្គោះបន្ទាន់ ប៉ុន្តែជាអកុសលក៏បានបាត់បង់ជីវិតទៅ។ ចំណែកជនបង្កក៏ត្រូវសម្ថតកិច្ចឃាត់ខ្លួន និង បញ្ចូនទៅដោះស្រាយតាមផ្លូវច្បាប់ ហើយក្នុងនោះជនបង្កក៏បានសារភាពឱ្យដឹងថា រឿងនេះខ្លួនបានទ្រាំមកជាង ៤ ឆ្នាំទៅហើយ ដោយជនរងគ្រោះជាមនុស្សចូលចិត្តផឹកស៊ីហើយបើកចម្រៀងតម្លង់ជារឿយៗ ធ្វើឱ្យខ្លួនមកពីធ្វើការហត់នឿយវិញរកតែសម្រាកមិនបានសោះ លុះដល់ទ្រាំលែងបាន ទើបលើកដៃបង្កហេតុបែបនេះតែម្តង៕
ប្រភព៖ Khaosod
