ពិតជាធ្វើឱ្យមហាជនអ្នកគាំទ្រមានការភ្ញាក់ផ្អើលជាខ្លាំង ក្រោយពីនាង Opal Suchata ម្ចាស់មកុដ Miss Universe Thailand 2024 និង ជាម្ចាស់តំណែងរងទី ៣ Miss Universe 2024 ត្រូវបានស្ថាប័ន Miss Universe ទម្លាក់ចេញពីតំណែង ក្រោយពីនាងគ្រវែងតំណែងរងចោលហើយត្រៀមទៅប្រកួតកម្មវិធី Miss World 2025 វិញ។
តាមព័ត៌មានបានឱ្យដឹងថា កាលពីថ្ងៃទី ២២ ខែមេសា ឆ្នាំ ២០២៥ កន្លងទៅនេះ ក្រុមហ៊ុន TPN GLOBAL ដែលជាអតីតម្ចាស់កម្មសិទ្ធិក្នុងការប្រឡង Miss Universe Thailand ពីឆ្នាំ ២០១៩ ដល់ឆ្នាំ ២០២៤ បានប្រកាសថា Opal Suchata ដែលជាបវរកញ្ញារងទី ៣ នៃកម្មវីធី Miss Universe 2024 បានក្លាយជាបេក្ខនារី Miss World Thailand 2025 ដែលនឹងត្រូវទៅប្រកួតនៅឯប្រទេសឥណ្ឌា នាខែឧសភា ឆ្នាំ ២០២៥ ខាងមុខនេះ។
ក្រោយពីការប្រកាសមិនបានប៉ុន្មាន ខាងស្ថាប័ន Miss Universe ក៏បានចេញមុខមកប្រកាសក្ដៅៗដោយដក Opal Suchata ចេញពីតំណែងជាបវរកញ្ញារងទី ៣ នៃ Miss Universe 2024 ភ្លាមៗ ដោយសារតែនាងបំពានកិច្ចសន្យា ដោយបានចូលទៅប្រកួតកម្មវីធីផ្សេងខណៈកំពុងកាន់ដំណែង៕
ប្រភព៖ Kapook
