គិតមកដល់ពេលនេះ រយៈពេលជាង ១ ឆ្នាំហើយ ដែលបរវកញ្ញាវ័យក្មេង ជូលី ល្អហួស ម្ចាស់តំណែង Miss Preteen Cambodia 2023 បានប្រកួតឈ្នះមកុដកម្មវិធីអន្តរជាតិ Miss Preteen Junior Idol World 2024 នៅឯប្រទេសថៃ កាលពីអំឡុងខែមីនា ឆ្នាំ ២០២៤ កន្លងទៅ។
ក្រោយក្លាយជាម្ចាស់មកុដអន្តរជាតិ Miss Preteen Junior Idol World 2024 ជាង ១ ឆ្នាំមកនេះ ជូលី ល្អហួស បានបំពេញតួនាទីយ៉ាងសកម្ម និង សាងស្នាដៃជួយលើកមុខមាត់ប្រទេសកម្ពុជាជាច្រើន ដែលនាងបានក្លាយជាបវរកញ្ញាវ័យក្មេងដ៏មានសក្កានុពលទាំងក្នុង និង ក្រៅប្រទេស។
ចំពោះតំណែងកម្មវិធីក្នុងស្រុក Miss Preteen Cambodia 2023 ពេលនេះ ល្អហួស ក៏បានផ្ទេរមកុដឱ្យម្ចាស់ថ្មីរួចប៉ុន្មានខែកន្លងមក ហើយនាងក៏បានបន្តក្ដីស្រមៃថ្មីចូលរួមប្រកួតជាបេក្ខភាពកម្មវីធី MTC 2025 ស្របពេលរង់ចាំពេលវេលាដែលកម្មវិធីអន្តរជាតិ Miss Preteen Junior Idol World 2025 ដំណើរការ ដើម្បីធ្វើការផ្ទេរមកុដអន្តរជាតិនេះឱ្យម្ចាស់មកុដថ្មីផងដែរ។
ដោយឡែក ថ្មីៗនេះ ខណៈកាន់តែកៀកពេលដែលត្រូវឡើងទៅផ្ទេរមកុដអន្តរជាតិ និង ស្របពេលមើលឃើញពីស្ថានភាពប្រទេសជាតិបច្ចុប្បន្នកំពុងតានតឹង ក៏បានឃើញម្ចាស់ស្ថាប័នបវរកញ្ញាលោក អ៊ិន វិចិត្រ បានប្រកាសលើហ្វេសប៊ុកឱ្យដឹងថា ស្ថាប័ននឹងមិនបញ្ជូនបវរកញ្ញា ជូលី ល្អហួស ទៅចូលរួមកម្មវិធី Miss Preteen Junior Idol World 2025 នៅឯប្រទេសថៃ ដើម្បីផ្ទេរមកុដឡើយ។
ក្នុងនោះ លោក អ៊ិន វិចិត្រ បានបង្ហោះជូនដំណឹងថា ៖ «ខ្ញុំសម្រេចចិត្តមិនបញ្ជូនបវរកញ្ញាខ្ញុំ ទៅប្រកួតនៅប្រទេសថៃនោះទេ ក្នុងនោះមានកម្មវិធីមួយ ដែលប្រកួតនៅខែ ៧។ Queen ល្អហួស ក៏មិនបានចូលរួមក្នុងការផ្ទេរតំណែងដោយផ្ទាល់ផងដែរ», «យើងត្រៀមខ្លួនរាប់ខែហើយមុនមានជម្លោះថៃខ្មែរ។ ក្រុមគ្រួសារបវរកញ្ញា គាត់ចំំណាយលុយរាប់មុឺនដុល្លាររៀបចំសម្លៀកបំពាក់។ អរគុណ ការលះបង់របស់ពួកគាត់ គិតជាតិជាធំជាងរឿងផ្ទាល់ខ្លួន», «សម្រាប់កម្មវិធី Junior Idol World យើងនៅរក្សាទំនាក់ទំនងគ្នា គ្រាន់តែយើងមិនបានចូលរួមនៅឆ្នាំនេះ រហូតដល់ប្រទេសយើងទាំង ២ ស្រុះគ្នាវិញ»៕
