ក្រោយពីការបង្ហាញខ្លួនជាបន្តបន្ទាប់របស់បេក្ខភាពហើយនោះ កម្មវិធី Miss Supranational Cambodia 2025 និង Mister Supranational Cambodia 2025 កាន់តែខិតកៀកមកដល់ និង ជិតរកបានម្ចាស់មកុដហើយ ដោយវគ្គផ្តាច់ព្រ័ត្រនឹងរៀបចំឡើងនៅថ្ងៃទី ០២ ខែមេសា ឆ្នាំ ២០២៥ ខាងមុខនេះ។ ក្នុងនោះ មានបេក្ខភាពជាច្រើន ដែលកំពុងតែលេចធ្លោ និង ទទួលបានកាគាំទ្រ ក៏ដូចជារំពឹងទុកថាជាម្ចាស់មកុដនាឆ្នាំនេះ ថែមទៀតផង។
ងាកមកកាន់ការរៀបចំកម្មវិធីប្រកួតនៅឆ្នាំ ២០២៥ នេះវិញ មហាជនអ្នកទស្សនាវិស័យបវរកញ្ញា បានស្រែកវ៉ាវគ្រប់គ្នា ខណៈ Miss Supranational Cambodia 2025 និង Mister Supranational Cambodia 2025 ខុសប្លែកពីឆ្នាំមុនៗ សឹងគ្រប់វគ្គ។
ក្នុងនោះ អ្នកគាំទ្រក៏បានសរសើរការរៀបចំកម្មវិធី និង ការគ្រប់គ្រងរបស់លោក ភួង វណ្ណា ដែលជា National Director ថ្មីក្នុងឆ្នាំដំបូង តែលោកពិតជាធ្វើបានល្អណាស់។
ដោយឡែក កាន់តែកៀកថ្ងៃប្រកួតវគ្គផ្តាច់ព្រ័ត្រ លោក ភួង វណ្ណា បានចេញមកបង្ហោះសារបង្ហាញពីគោលដៅ និង ឆន្ទៈនៃការរៀបចំកម្មវិធីប្រកួត Miss Supranational Cambodia 2025 និង Mister Supranational Cambodia 2025 ថាមិនត្រឹមតែជាឆាកក្នុងការប្រកួតសម្រស់នោះទេ តែជាការបង្ហាញនូវសក្តានុពលគ្រប់វិស័យរបស់កម្ពុជាលើឆាកអន្តរជាតិ។
ក្នុងនោះ លោក ភួង វណ្ណា បានរៀបរាប់ជាភាសាអង់គ្លេស ដោយមានន័យជាភាសាខ្មែរថា៖ «Supranational Cambodia មិនត្រឹមតែជាវេទិកាសម្រាប់កម្មវិធីប្រកួតសម្រស់ ឬការប្រកួតប៉ុណ្ណោះទេ វាក៏ជាឧបករណ៍ដ៏មានឥទ្ធិពលមួយ ក្នុងការលើកស្ទួយប្រទេសកម្ពុជាយើងលើឆាកអន្តរជាតិ។ តាមរយៈវេទិកានេះ យើងអាចបង្ហាញពីវប្បធម៌ដ៏សម្បូរបែបរបស់ប្រទេសកម្ពុជា សក្តានុពលទេសចរណ៍ ឱកាសសេដ្ឋកិច្ច និង ទេពកោសល្យរបស់ប្រជាជនរបស់យើង។ កម្មវិធីនេះ ជាស្ពានតភ្ជាប់ប្រទេសកម្ពុជាជាមួយអន្តរជាតិ លើកកម្ពស់ភាពជាមោទននៃប្រជាជនកម្ពុជា ក្នុងការទាក់ទាញការវិនិយោគ ទេសចរណ៍ និង ការយកចិត្តទុកដាក់យ៉ាងវិជ្ជមានពីទូទាំងពិភពលោក។ ពិតជាមានមោទកភាពចំពោះបេក្ខជន Supranational Cambodia 2025»៕
