បន្ទាប់ពីបានខ្នះខ្នែងចូលរួមចំណែកជួយប្រទេសជាតិមួយរយៈ តាមរយៈសកម្មភាពសប្បុរសធម៌ និង ការប្រើសំឡេងផ្សព្វផ្សាយពីកម្ពុជាផ្សេងៗ ពេលនេះ កញ្ញា ពេជ្រ វត្តីសារ៉ាវឌ្ឍី ក៏បានវិលទៅបំពេញតួនាទីជាបេក្ខភាពប្រកួតបវរកញ្ញា Miss Universe Cambodia 2025 វិញហើយ ព្រមទាំងបន្តហ្វឹកហាត់ត្រៀមខ្លួនសម្រាប់ការប្រកួតវគ្គផ្ដាច់ព្រ័ត្រដណើ្ដមមកុដឆាប់ៗនេះ។
បើតាមរយៈការបង្ហោះលើហ្វេសប៊ុកផេកផ្លូវការ Miss Universe Cambodia ក៏បានឃើញមានការប្រកាសឱ្យដឹងថា កម្មវិធីនឹងរៀបចំការប្រកួតវគ្គផ្ដាច់ព្រ័ត្រ និង ជារាត្រីគ្រងមកុដថ្មីនៃ Miss Universe Cambodia 2025 ដែលនឹងធ្វើឡើងនៅថ្ងៃទី ១២ ខែកញ្ញា ឆ្នាំ ២០២៥ ខាងមុខនេះ។
ស្របពេលកៀកថ្ងៃប្រកួតផ្ដាច់ព្រ័ត្រនេះដែរ គេក៏បានឃើញហ្វេសប៊ុកផេករបស់បេក្ខភាព ពេជ្រ វត្តីសារ៉ាវឌ្ឍី បង្ហោះសារស្ទង់មតិមហាជនអ្នកគាំទ្រ ដែលនាងបានសួរចិត្តមហាជនខ្មែរ ថាគិតយ៉ាងណាចំពោះការចូលរួមតំណាងកម្ពុជាក្នុងការប្រកួតលើឆាក Miss Universe ក្នុងឆ្នាំ ២០២៥ នេះ។
ក្នុងនោះ កញ្ញា ពេជ្រ វត្តីសារ៉ាវឌ្ឍី បានរៀបរាប់ថា ៖ «តីតីសូមសួរចិត្តបងប្អូនខ្មែរយើងបន្តិច តើអ្នកទាំងអស់គ្នាគិតយ៉ាងណាសម្រាប់ការចូលរួមតំណាងឱ្យកម្ពុជាយើងក្នុងកម្មវិធីបវរកញ្ញាចក្រវាលនៅក្នុងឆ្នាំនេះ??»។
ទន្ទឹមនឹងនេះ មហាជនអ្នកគាំទ្រវិស័យបវរកញ្ញា ក៏បានចូលរួមបញ្ចេញមតិ ដោយភាគច្រើនគាំទ្រឱ្យកម្ពុជាបន្តតំណាងប្រទេសឈរលើឆាកអន្តរជាតិក្នុងកម្មវិធីនេះ ព្រមទាំងបង្ហាញគាំទ្រលើកទឹកចិត្តចំពោះរូបនាងផ្ទាល់ និង ជូនពរឱ្យទទួលបានជោគជ័យអាចតំណាងកម្ពុជាប្រកួតលើឆាកអន្តរជាតិដ៏អស្ចារ្យនេះទៀតផង៕
