ថ្មីៗនេះ នៅក្នុងប្រទេសថៃ កំពុងផ្ទុះករណីរបស់ស្រ្តីម្នាក់ ដែលបានបាត់បង់ជីវិត ក្រោយពីបានកើតជំងឺដុះសាច់ក្នុងខួរក្បាល ហើយមិនព្យាបាលជាមួយពេទ្យ តែរត់ទៅព្យាបាលជាមួយនឹងគ្រូថ្នាំបុរាណវិញ។
ស្រ្តីខាងលើនេះមានវ័យ ៦១ ឆ្នាំ ហើយតាមរយៈកូនស្រីរបស់ស្រ្តីនេះបានរៀបរាប់ឱ្យដឹងថា ម្តាយរបស់នាងចាប់ផ្តើមធ្លាក់ខ្លួនឈឺតាំងពីខែវិច្ឆិកា ឆ្នាំ ២០២៥ កន្លងទៅម្ល៉េះ ហើយនាងក៏បាននាំទៅពិនិត្យមើល ទើបដឹងថាម្តាយមានដុះសាច់ក្នុងខួរក្បាល ដែលជាដុំកាចផងដែរ។ នាងបានយកម្តាយទៅព្យាបាលនៅមន្ទីរពេទ្យជុឡា នាទីក្រុងបាងកក ដោយផ្ញើមីងឱ្យជួយនៅមើល ចំណែកឯនាងក៏ត្រឡប់ទៅមើលកូននៅឯខេត្តវិញ។ លុះបានត្រឹមតែ ២ ថ្ងៃ មីងរបស់នាងក៏បានប្រាប់ថា នឹងយកម្តាយទៅព្យាបាលនៅផ្ទះគ្រូថ្នាំបុរាណ ដែលនៅកណ្តាលព្រៃនាខេត្ត Prachinburi វិញ។
គ្រូថ្នាំបុរាណនោះ បានឱ្យម្តាយនាងឈប់ប្រើថ្នាំពេទ្យ ហើយផឹកទឹកដែលដាំពីផ្កាស្បៃរឿង ព្រមទាំងបានចាក់ថ្នាំអ្វីមិនដឹងចូលទៅសរសៃឈាមម្តាយនាងទៀតផង។ ម្តាយនាងព្យាបាលនៅទីនោះបាន ៥ ថ្ងៃ ក៏សន្លប់បាត់មាត់ ហើយត្រូវបញ្ចូនទៅសង្រ្គោះបន្ទាន់បានត្រឹមតែ ៩ ថ្ងៃ ម្តាយក៏ស្លាប់បាត់ទៅ ដែលគ្រូពេទ្យបានឱ្យដឹងថា ខួរក្បាលរបស់ម្តាយនាងបានស្លាប់បាត់ទៅហើយ។
យ៉ាងណាមិញ ខាងអាជ្ញាធរពាក់ព័ន្ធកំពុងតែចុះទៅត្រួតពិនិត្យផ្ទះគ្រូថ្នាំបុរាណខាងលើនេះ ហើយខាងការិយាល័យសុខភាពសាធារណៈបានប្រកាសថានឹងប្រមូលព័ត៌មាន និង ភស្តុតាងផ្សេងៗដើម្បីកាត់ទោសអ្នកដែលពាក់ព័ន្ធនឹងការព្យាបាលនេះផងដែរ៕
ប្រភព៖ Thairath
