ថ្មីៗនេះ ប្រទេសថៃកំពុងតែមានការផ្ទុះឆ្លងជំងឺដែលកើតឡើងពីការរួមភេទឡើងវិញ ក្នុងនោះមានទាំងជំងឺអេដស៍ និង ជំងឺស្វាយ ដែលកំពុងតែលុកលុយនៅក្នុងប្រទេស បង្កឱ្យអាជ្ញាធរពាក់ព័ន្ធមានការបារម្ភជាខ្លាំង។
តាមព័ត៌មានបានឱ្យដឹងថា បន្ទាប់ពីជំងឺអេសដ៍កំពុងរីករាលដាល ជាមួយគ្នានោះជំងឺស្វាយក៏កំពុងតែរីករាលដាលផ្ទុះឡើងខ្លាំងដែរ ដោយក្នុងនោះមានអ្នកឆ្លងកើនឡើងគួរឱ្យកត់សម្គាល់ ជាពិសេសគឺក្រុមយុវជនដែលប្តូរដៃគូរួមភេទញឹកញាប់ និង មិនបានការពារឱ្យបានត្រឹមត្រូវ។
បើយោងតាមរបាយការណ៍មួយបង្ហាញថា តាំងពីថ្ងៃទី ១ ខែមករា ឆ្នាំ ២០២៥ ដល់ថ្ងៃទី ២៩ ខែឧសភា ឆ្នាំ ២០២៥ ថ្មីៗកន្លងទៅនេះ ត្រឹមចំនួន ៥ ខែ គឺមានអ្នកឆ្លងជំងឺស្វាយទាំងអស់ ១១៣២ នាក់ ដោយក្នុងនោះនៅ ៤ ខេត្តមានអ្នកឆ្លងច្រើនជាងគេ គឺខេត្តណាខនរ៉ាឆាស៊ីម៉ា មានចំនួន ៥៥៥ នាក់ ខេត្តបុរីរ៉ាំ មាន ២៥៥ នាក់ ខេត្តសុរិន្ទ មាន ២៤៦ នាក់ និង ខេត្តឆៃយ៉ាភូមិ មាន ៧៦ នាក់។
យ៉ាងណាមិញ អាជ្ញាធរពាក់ព័ន្ធកំពុងខ្នះខ្នែងពង្រឹងវិធីទប់ស្កាត់ជំងឺទាំងនេះ មិនឱ្យមានការរីករាលកាន់តែធ្ងន់ធ្ងរឡើង ដោយអំពាវនាវឱ្យប្រជាជនមានការប្រុងប្រយ័ត្ន និង ការពារឱ្យបានល្អក្នុងការមានសកម្មភាពផ្លូវភេទផងដែរ៕
ប្រភព៖ Khaosod
