សារព័ត៌មានបរទេស បានរាយការណ៍ពីករណីមួយនៅសហរដ្ឋអាមេរិក ដែលស្រ្តីវ័យចំណាស់ម្នាក់មានជំងឺវង្វេងវង្វាន់ ហើយត្រូវកូនស្រីទុកឱ្យនៅផ្ទះតែម្នាក់ឯង រហូតត្រូវឆ្កែចំនួន ៥៤ ក្បាលដែលនាងចិញ្ចឹម នាំគ្នារោមខាំទាល់តែបាត់បង់ជីវិត។
តាមព័ត៌មានបានឱ្យដឹងថា ករណីមួយនេះបានកើតឡើងនៅរដ្ឋ Colorado សហរដ្ឋអាមេរិក ដោយក្នុងនោះគេបានប្រទះឃើញស្រ្តីចំណាស់វ័យ ៧៦ ម្នាក់ បានដេកស្លាប់នៅក្នុងផ្ទះ ដែលសពមានសភាពដាច់រហែកគួរឱ្យអាណិត។ ខាងអាជ្ញាធរបានពិនិត្យឃើញថា នៅក្នុងផ្ទះនោះមានចិញ្ចឹមសត្វឆ្កែចំនួន ៥៤ ក្បាល និង សត្វបក្សីចំនួន ៧ ក្បាលទៀត ចំណែកស្រ្តីចំណាស់ខាងលើនេះ គឺបានបាត់បង់ជីវិតដោយសារតែសត្វឆ្កែនៅក្នុងផ្ទះវាយប្រហារ។
យ៉ាងណាមិញ កូនស្រីដែលមានវ័យ ៤៧ ត្រូវបានអាជ្ញាធរឃាត់ខ្លួន ដោយសន្និដ្ឋានថានាងមានចេតនាបណ្តោយឱ្យម្តាយដែលមានជំងឺវង្វេងដំណាក់កាលធ្ងន់ធ្ងរឱ្យនៅផ្ទះតែម្នាក់ឯង ហើយនាងចេញទៅរកស៊ី។ លើសពីនេះទៅទៀត សត្វឆ្កែដែលនាងចិញ្ចឹមក៏មិនបានទទួលការថែរក្សាឱ្យបានត្រឹមត្រូវ ដែលពួកវាស្ថិតក្នុងសភាពខ្វះអាហារ និង អត់អនាម័យ។ ចុងក្រោយនាងត្រូវបញ្ជូនខ្លួនទៅកាន់ពន្ធនាគារ ក្រោមការចោទប្រកាន់ពីបទ ការធ្វេសប្រហែសបណ្ដាលឱ្យមនុស្សស្លាប់ និង ការធ្វើបាបសត្វដោយចេតនា៕
ប្រភព៖ Khaosod
