បើគិតមដល់ពេលនេះ រយៈពេលប្រមាណ ៨ ខែមកហើយ ដែលតារាចម្រៀងប្រុស លោក គូម៉ា និង ភរិយា គឺតារាសម្តែងស្រី ម៉ៅ គឹមធីតា បានឃើញមុខកូនប្រុសបណ្តូលចិត្ត ដែលជាតំណក់ឈាមអាពាហ៍ពិពាហ៍រួមគ្នា។ ក្នុងនោះ កូនប្រុសបណ្តូលចិត្តរបស់លោក គូម៉ា និង អ្នកនាង ម៉ៅ គឹមធីតា បានឃើញពន្លឺព្រះអាទិត្យកាលពីអំឡុងខែ មករា ឆ្នាំ ២០២៥ កន្លងទៅ។
ក្រោយពីទទួលបានចំណងដៃអាពាហ៍ពិពាហ៍ហើយនោះ អ្នកគាំទ្រសង្កេតឃើញថា គូស្វាមីភរិយាអ្នកសិល្បៈមួយគូនេះ កាន់តែមមាញឹកទាំងការរកស៊ី និង អាជីពសិល្បៈ។ ជាងនេះទៅទៀត ក្រឡេកទៅមើលអូនតូច ប៊ូឡា គូម៉ាបាហ៊ូ កូនប្រុសរបស់លោក គូម៉ា និង អ្នកនាង ម៉ៅ គឹមធីតា វិញ ក៏មិនចាញ់ប៉ាម៉ាក់នោះដែរ ពោលគឺអូនតូច ទើបអាយុ ៨ ខែទេ តែមានទីផ្សារការងារក្លាយជា BA របស់ផលិតផលកុមារទៀតផង។
ងាកទៅកាន់អ្នកម៉ាក់វ័យក្មេង ម៉ៅ គឹមធីតា ឯណោះវិញ ក្រោយចាកឆ្ងាយពីសិល្បៈតាំងពីមុនរៀបការ រហូតសម្រាលបានកូនប្រុសរួចហើយនោះ ថ្មីៗនេះ គេបានឃើញតារាសម្តែងរូបនេះ បានវិលត្រឡប់មកក្តោបទីផ្សារការងារវិញហើយ បើទោះជាមិនមែនជាការសម្តែងដូចមុនក៏ពិតមែន។ ក្នុងនោះ គេបានឃើញ អ្នកនាង ម៉ៅ គឹមធីតា បានបង្ហាញវត្តមានក្នុងការថតផ្សព្វផ្សាយផលិតជាមួយនឹងគ្រួសារតូច ពោលគឺ លោក គូម៉ា ជាស្វាមី ព្រមទាំងកូនប្រុសជាទីស្រឡាញ់ផងដែរ៕
