កូនខ្មែរបេះដូងតែមួយ! មាន សូនីតា រៃអង្គាសទឹកប្រាក់ទុកជួយបងប្អូនខ្មែរភៀសសឹកបានជិត ២ ពាន់ដុល្លារ និង ត្រៀមនាំសម្ភារសំខាន់ៗទៅដល់ទីតាំងផ្ទាល់

ទ្រាំឈរមើលបងប្អូនភៀសសឹកពីចម្ងាយដោយក្ដីរំជួលចិត្ត នៅថ្ងៃទី ២៧ កក្កដា តារាសម្តែង មាន សូនីតា នឹងនាំយកសម្ភារសំខាន់ៗ ក៏ដូចជាទឹកប្រាក់រៃអង្គាសទៅកាន់ទីតាំងបងប្អូនភៀសសឹកផ្ទាល់។

ជាក់ស្តែង នៅថ្ងៃទី ២៥ ខែកក្កដា មាន សូនីតា បានបង្ហោះនៅលើទំព័រហ្វេសប៊ុករបស់ខ្លួនថា៖ «ជម្រាបសួរបងប្អូនជនរួមជាតិទាំងអស់គ្នា ដូចបងប្អូនដឹងស្រាប់ហើយថានៅក្នុងស្ថានភាព និង កាលៈទេសៈមួយនេះបងប្អូនប្រជាជនខ្មែរយើង ដែលរស់នៅជាប់ខ្សែបន្ទាត់ព្រំដែនមួយចំនួនធំកំពុងតែត្រូវបានភៀសខ្លួនពីផ្ទះ ពីស្រុកកំណើតដ៏កក់ក្ដៅរបស់ខ្លួនមករកតំបន់ដែលមានសុវត្ថិភាព ដូច្នេះហើយនាងខ្ញុំ មាន សូនីតា ក៏មិនទ្រាំឈរមើលពីចម្ងាយដែរ ឥលូវនេះខ្ញុំនឹងពាំនាំយកសម្ភារចាំបាច់មួយចំនួន ដូចជាក្រមា អាហារ និង គ្រឿងប្រើប្រាស់មួយចំនួនទៅជួយ និង ជួបផ្ទាល់ជាមួយនឹងពួកគាត់តែម្ដង ប្រសិនបើបងប្អូនជនរួមជាតិយើងចង់ចូលរួមបរិច្ចាគជាទឹកប្រាក់ ដែលជាទឹកចិត្តដើម្បីជួយដល់ប្រជាជនខ្មែរ ដែលកំពុងខ្វះខាត អាចចូលរួមជាមួយរូបនាងខ្ញុំបានតាមរយៈ ABA របស់ខ្ញុំផ្ទាល់តែម្ដង ហើយពួកខ្ញុំនឹងទៅជួបបងប្អូនពូមីងដោយផ្ទាល់ដល់ទីកន្លែងតែម្ដងនៅថ្ងៃទី ២៧ នេះ។ ខ្ញុំសូមធានានូវរាល់កាក់សេន ដែលបងប្អូនបានបរិច្ចាគនឹងបានទៅដល់ដៃបងប្អូន ដែលខ្វះខាត និង កំពុងភៀសខ្លួន។ ខ្មែររួមគ្នា ខ្មែរសាមគ្គីគ្នា ខ្មែរខ្លាំង»។

បន្ទាប់ពីបង្ហោះសារមិនបានប៉ុន្មាន គិតត្រឹមម៉ោង ១០ និង ២០ នាទីយប់មិញនេះ មាន សូនីតា នាងទទួលបានការផ្ញើទឹកប្រាក់បរិច្ចាគពីបងប្អូនសប្បុរសប្រមាណ ១៨៤៣ ដុល្លារ។ ដូចនាងបានលើកឡើង ជាមួយទឹកប្រាក់នេះ នាងធានានឹងទៅដល់ដៃបងប្អូនភៀសខ្លួន រួមជាមួយសម្ភារសំខាន់ៗ ដែលនាងបានត្រៀមរួចរាល់៕​